相信香港唔少球迷仍然記得伊朗「三劍俠」中去過德甲搵食嘅前鋒戴伊，最近亦有入選國家隊；原來佢同范志毅係朋友，知道范大將軍到香港落班，都覺得奇怪。
伊朗為備戰亞洲盃外圍賽分組賽作客北韓，日前就到北京，作為轉飛北韓中途站，亦順道逗留兩日練波。戴伊就問記者，佢老友范志毅近況如何；當佢得知范效力香港甲組球會澎馬流浪時，就話以范嘅實力重可以立足英倫球壇，或者中國甲A，重問係咪香港球會重金禮聘佢咁話。
我求大俠身為香港人都唔知好嬲定好笑，雖然戴伊九七年到過香江踢回歸盃，但佢真係唔多熟悉香港球壇境況，以為好景；莫非早排斟唔成去踢中國甲B，想探路香港有無金掘？咁就真係唔使諗囉！
蘋果波神成日都講「歐冠盃單跳」理論，喺歐冠盃贏盤嘅球隊，通常會喺之後嗰場本土聯賽輸盤；估唔到呢個理論連非歐洲頂級聯賽嘅球隊都用得着，好似比利時嘅布魯日喺上周中歐冠盃爆冷贏AC米蘭，點知喺星期日嘅本土聯賽對升班嘅靴斯頓蘇達，多踢一人都要輸二比四，真邪！
皇馬嘅巴西球星朗拿度嘅外表好難令人想像得到佢可以做電影主角，但由於佢好波又有名氣，將會擔任一部名為《夏日表演》嘅電影主角，都係做番成功球星。套戲會喺今年十一月當朗拿度隨巴西國家隊返國踢世界盃外圍賽時開鏡，之後亦會到馬德里取景，都咪話唔巴閉。
上周六西甲旺完主隊W之後，周日輪到幾支客軍巴塞、切爾達同馬體會三支今屆踢得幾曳嘅球隊反底，贏到對手兩球或以上；呢啲傳統球隊真係爛船有三斤釘，睇啱時勢可以追追佢哋，不過是否長追就見仁見智，因為睇到𠵱家總覺得佢哋同皇馬、拉科及華倫爭半皮波。
講開又講，淨吞切爾達四蛋嘅西甲包尾大幡愛斯賓奴，佢哋嘅前西班牙國家隊教頭奇文迪已聞到魷魚香，原因除咗可能佢領導無方外，嗰件早兩輪對皇馬接紅牌嘅後衞禾美就真係靠害，因為對切爾達時，復出嘅佢踢咗三十五分鐘又被逐，打少件唔輸有鬼。