早餐派嘅議員唔知係夠勇，定收到阿爺北京嘅眼色，竟然膽大包天，叫老董一炮過帶晒六十位立法會議員上京，實行一笑泯恩仇；去到北京，李家祥佢哋對住港澳辦主任陳佐洱，都一樣「提議」，話畀晒六十個議員上京朝聖，嘩，包括埋「台獨分子」劉慧卿？
八方一直覺得，中方喺對待立法會議員方面，違反《基本法》嘅精神，而老董所領導嘅特區政府亦無理地矮化自己嘅議員，以為咁就可以迎合中央嘅喜好。
香港嘅立法機關係按《基本法》組成嘅，議員係合法產生，佢哋係名副其實嘅「中華人民共和國香港特別行政區立法會議員」。但係每次啲國家領導人訪港，呢啲民意代表就冇一次被安排以議員身份見面。而其他所謂嘅自己友就可以用人大或者政協身份出席各項活動。唔通堂堂中華人民共和國特區立法會係一個非法機構，其議員係三合會成員？就算黑社會，都有愛國啩？
傳真︰2623-9278
電郵︰