汽車專題：
老爺車齊集中環展現昔日魅力

響剛過去嘅星期日，中環遮打道唔止係行人專用區咁簡單，而且重化身成老爺車展覽場；當日場內塞滿咗七十多部車，但大家不但唔介意被它們佔去路面，並興趣盎然地圍觀拍照，皆因呢批車都係日常難得一見嘅經典車款，自然惹人注目啦！

記者、攝影：畢明

今年嘅老爺車展，係由超級品牌LouisVuitton與香港老爺車會攜手舉辦，可算係本港車壇一年一度嘅盛事；而且至今已為第24屆㖭！今屆全場共有79部年代久遠嘅汽車展出，由二十世紀初到八十年代都有，好多都比年輕一點嘅讀者年紀還要大。觀賞老爺車，除車齡外，其實最重要都係睇車主保養車輛嘅心機及功夫，如果唔係投入大量心血，好難想像車齡三、四十年嘅汽車外觀仍可像新車一樣、仍能在街道上行駛。
而喺舉行展覽嘅前一日，老爺車會已經預先選出咗七個獎項，然後喺車展期間，再經由會員投票選出最後兩個獎項；獲獎嘅九部老爺車，足以堪稱老爺之霸，各有特色，而且年份更橫跨九十多年呢！

最渴望擁有車輛
福特TType
不用說明，呢部TType肯定係全場焦點所在；皆因佢喺1909年於加拿大生產，完全係上世紀汽車設計，甚麼手攪式起動，外露嘅懸掛系統，仍然保留有如馬車般嘅風味，而最煞食嘅地方，都重係兩盞火水燈及手泵響號，實在難以想像此車仍然如此光鮮新淨。

最佳機件
積架EType2+2
雖然大部份嘅積架EType，都係運往美國市場出售，但眼前呢部卻係右軚版；全車新淨不特止，打開頭冚睇過引擎艙的話，其新淨程度，絕對能令好多人都會懷疑呢部係咪真係一部1969年嘅積架汽車。

最佳車身外觀
平治190SL
有時真係一啲舊車才有惹人注意嘅韻味，就好似呢部1963年嘅平治190SL咁，純白色車身滲透出來嘅貴氣及瀟灑感覺，一眾現代車款實在難以追及；而車廂布局亦保持原汁原味，當然獨特嘅平治軚環設計，亦能令人回味無窮呢！

最佳外形車輛
ACCobraReplica
車仔細細嘅ACCobraReplica，可算係車展中嘅「後生仔」，出生年份為1984年；不過大家別以為佢車仔細細，性能表現會較差，但原來佢配備咗一台3528cc嘅大容積引擎，表現絕對不能小覷。另外，此車能奪得最佳外形獎，相信係因為車身打理得一塵不染，望落全車新淨非常，靚到絕有關。

最佳房車
勞斯萊斯SilverShadowI
要數坐得舒服嘅最佳房車，相信大家都唔會懷疑勞斯萊斯嘅地位。今屆獲獎嘅呢部SilverShadowI，係於1975年出廠，並由一台6750ccV8引擎去推動龐大嘅身軀，連同後繼車種SilverShadowII，兩者只係生產咗不足35,000輛。

最佳開篷車
MGTC
呢部1947年嘅MGTC，古典嘅外形設計，響車展中自然吸引到無數人對其行注目禮，揸出街一定贏晒；而且唔止贏視線，此車喺香港及中國亦曾贏得甚多獎項呢！

最優雅車輛
法拉利246GTDino
今次得獎嘅車輛中，有兩部係法拉利出品，碰巧同樣都係來自246車系。呢部獲選為最優雅車輛嘅246GTDino，係於1973年製造，外形充滿着一份意大利風情。最難得係呢部屬極罕有嘅右軚版本，當年只生產咗488部，從而增添多一份收藏及欣賞價值。

最佳轎跑車
法拉利246GTSDino
作為跑車中嘅名牌，法拉利嘅魅力可謂沒法擋。呢部開篷246GTSDino於1974年生產，此車糅合咗優美外形及賽車化嘅高性能表現，雖然經歷咗三十年嘅時間，但車迷對其仍然留下難以磨滅嘅深刻印象。

最佳內裝
保時捷356
呢部1962年嘅保時捷356，雖然贏嘅係最佳內裝獎，但其實全車由外至內都保持極高狀態；而最早嘅356跑車，係於1948年開始生產，此車則屬較後期嘅型號。

同場加映
場內除一眾獲獎車輛備受車迷注視外，原來喺展場嘅另一端，亦展出咗唔少值得大家觀賞嘅老爺車；雖然佢哋未能獲得甚麼獎項，但一眾車主仍靠在車旁，臉上掛着自豪嘅微笑，相信獎項對佢哋嚟講，已經唔再重要，最緊要係心頭好所帶來嘅滿足感。

豐田LC55
老爺車一樣有四驅車，難怪呢部1977年出廠嘅越野好手——豐田LC55都來贈興啦！

勞斯萊斯
PhatomIISedancadeVille
此車於1934年出廠，並屬半島酒店嘅專車，尊貴派頭，氣勢十足，若用嚟做婚禮花車的話，真係威到喊。

Datsun260Z
於1977年出廠嘅Datsun260Z，響當年可謂紅極一時，話唔定大家嘅爸爸亦曾駕駛過。