昨日，亞Mark講開福方旗下紳寶及歐寶汽車嘅市場部有人事變動，咁Damian離職之後，會由邊個接替佢嘅原有位置呢？咪係早前Damian物色返嚟幫佢手嘅Desmond囉！查實，Desmond昔日響萬事得汽車市場部工作多年，對於汽車推廣及售後服務，經驗豐富，所以Damian嘅突然請辭，有關嘅福方高層亦好放心由Desmond接替佢嘅工作㗎！
至於話嚟緊福方有甚麼新動向？亞Mark聽聞佢哋早前全力支持電影《無間道III終極無間》嘅拍攝工作，重借出多部歐洲高級轎車予片中主角作座駕，兩者相輔相成，相信套片日後公映，勢必哄動兼且來得相得益彰㗎！然而，繼後最惹人注視嘅部署，相信會係全新Astra車系於明年上半年到港嘅事宜，事關新款Astra以全新面貌及包裝示人，對同屬德國嘅奧迪A3及福士Golf，勢必構成直接威脅，據知遲吓到港嘅新Astra，重會有個吸引嘅車價及包裝，有興趣嘅Fans就真係要耐心多等一會喇！