萬聖節就到，九倉喺尖沙嘴擎天半島嘅售樓處，特別布置到好有萬聖節氣氛，重擺咗個塔羅牌攤位，邀請大師姚安娜幫參觀人士占卜，增添神秘感，令場面更有節日氣氛。
咁好機會，九倉黃光耀都趁機問番幾個問題，佢話私人問題就唔方便透露，不過就問咗大家都好關注嘅問題，就係樓市發展走勢。
結果抽到一張叫「挑戰」嘅牌，姚安娜解釋，張牌意味住香港嘅樓市重要經歷一段艱難時期，之後就會有收成，逐漸步向穩定，好似農夫耕種咁，經過風吹雨打先會有成果。另外一張「覺知」嘅牌，就提示買賣物業雙方，要好似獵人咁，有警覺性，眼光要準確。
占卜結果準唔準就見仁見智，不過重記得年初時，民政事務局局長何志平喺沙田大圍車公廟，為香港求咗支下下籤後，跟住就沙士，到𠵱家重成日有人提，好彩黃先生今次都幾生性，用塔羅牌占卜嘅結果都唔算太壞。
麗豐控股上海剛開賣嘅豪宅上海凱欣豪園，同將奠基嘅五月花廣場，今個禮拜請傳媒去採訪，麗新林百欣同林建康重親自出席主持。九十高齡嘅林伯真係老當益壯，上次去完北京，今番再去上海，咁頻撲都重咁生猛。
另外，本港發展商興起往內地展銷樓盤熱潮，長實偕系內嘅和黃，今個禮拜二同三，齊齊參與喺北京舉辦嘅「香港房地產節」，地點重喺自己地頭嘅北京東方廣場。
投資移民計劃今日接受申請，美聯晨早九點就去入境處代客交申請表，擺到明搶飲頭啖湯。蘭西八卦問中原有冇相關安排，答案係暫時冇。查實呢單料煲咗成幾個月，今日終於進入大直路，邊個攞頭威唔重要，最緊要係業界嘅寄望可以實現，咁就皆大歡喜囉。
另外，蘭西睇過份投資移民計劃申請表，發覺有啲重要欄目真係幾簡單。好似土地投資一欄，只填購買時嘅價值、按揭額同用咗幾多錢。買家之後起樓嘅錢又點計呢？難怪有業界話，呢啲表格都係要搵專家填，否則有排畀審批部查問。
長沙灣宇晴軒一向都強調，屋苑設施好多都係為細路仔度身訂做，過去兩日，重擺咗部爆穀機喺售樓處，當大家都以係用嚟𠱁小朋友嘅時候，原來係另有玄機，寓意「爆穀谷一谷，樓市唔會縮」喎。
呢個爆穀同樓市嘅微妙關係，原來又係嚟自長實趙國雄，不過，佢噚日冇喺售樓處出現，由高級營業經理郭子威解畫，佢話希望樓市好似爆穀咁，可以爆發一輪熱潮。
聽講趙國雄啱啱放完假返嚟，唔知呢個大道理，係咪喺放假時參透嘅呢？
蘭西有次同經紀閒聊，佢慨歎生意難撈，之前樓市淡，想搵個客睇樓都難，𠵱家個市順番啲，多咗客睇樓，但係難搵盤，蘭西好疑惑，唔通個市好得滯，啲盤賣晒？但睇番近排個市又唔似旺到咁喎。
原來係大部份業主都抱有幻想，覺得今次個市前景秀麗，怕賣平咗，索性封盤。經紀話，呢個情況喺今年初出現過，但原因係沙士肆虐，真係生意難撈。
蘭西
電郵地址：
