海外試車：本報記者德國實地測試<br>第五代福士Golf徹底變革

海外試車：本報記者德國實地測試
第五代福士Golf徹底變革

迷倒不少香港車迷嘅德國福士Golf車系，剛於早前推出全新第5代車款，脫胎換骨嘅外形教人眼前一亮之餘，新車重有全新FSI引擎同DSG半自動波箱新配踏，究竟新款第5代Golf有幾正？咁就要睇吓我哋嘅特派記者，早前親赴德國Wolfsburg嘅實地試車報告喇！

記者、攝影：李勤

■新一代福士Golf，無論外形及車廂布局，以至係機械配搭，皆予人一新耳目之感。

■炯炯有神嘅雙圓Xenon大燈配搭，令人目炫心動。

■門邊電鏡加有方向指揮燈，出眾又悅目。



福士Golf，不過係一款走大眾化路線嘅普及代步車款而已，惟出眾性能及其可靠性，卻令世界各地嘅Golf迷鍾情不二，加上一身獨特賣相，更令Golf歷久常新，給Golf迷如癡如醉呢！

■高置尾定翼連煞車燈，既見穩定性又富安全感。

■尾廂開關暗掣，原來係「福士」廠徽。



出眾賣相倍見活力
而屬第5代嘅新Golf，更變得圓渾富時代感，尤其係一對令人看得出神嘅Xenon大燈組合，加上原廠霧燈，重有附加方向指揮燈嘅門邊電鏡配搭，還有跟頭燈相呼應嘅高聚焦尾燈裝置，均予人留有深刻印象㗎！

■座艙陳設無論色調及用料，均予人時尚又豪邁得體嘅感覺。

■前排仿桶形座椅配搭，既貼身又見承托力之餘，就連後排空間亦見寬敞闊落。

■中控台備有原廠恒溫冷氣及高級音響外，各設備嘅控制鍵，鋪排亦見觸手可及。

■前排座席下設有隱蔽式雜物匣，既方便又易用。



座艙講究設備突出
舊有Golf車廂較平實並不起眼，惟新車內裏卻變得寬敞舒適之餘，雙色調子匹配人體工學設計，既悅目又見各個按鍵有觸手可及嘅方便，更甚者還帶出一份跑車個性呢！再者，全新一體式中控台編排有序，除高級音響及恒溫冷氣外，重有前後房燈、多個儲物匣同杯座組合，少不了重有全車共8個安全氣袋同充氣簾幕㖭！

■三幅式軚環上，備有各設備嘅控制鍵，方便易用。

■全新6前速DSG半自動波箱，能讓引擎發揮至極。



FSI新偈動力充裕
新Golf備有全新1.6及2.0公升FSI引擎，惟聽聞代理會以前者打頭陣引入香港，兩台引擎表現動力源源不絕，尤其係後者更甚，高轉發揮又突出。至於一套全新6前速DSG（DirectShiftGearbox）半自動波箱，反應既利落又暢順，看來較原有Tiptronic設計更出眾，惟廠方現階段只配備於TDI型號身上，相信香港車迷要遲吓方有機會見識到呢套DSG波箱嘅好處。然而，新Golf仍保持有一貫出眾操控及循迹力，柔韌嘅吸震效果，既富支持力又見舒適性，絕對合乎日常代步需要。

■尾廂容量甚高，遇有需要時更可將尾排收摺放平，以增加載物容量。

《人車誌》主編EdmondLau：造型性能變得更好更強
呢部屬第5代嘅全新Golf，造型無疑較上一代型號更富活力感，予人眼前一亮嘅悅目感；其次，車廂空間既寬敞又見時尚氣息。全新FSI引擎系列跟嶄新DSG半自動波箱，令性能及加速表現有大躍進外，新Golf重保持有一貫靈巧敏捷嘅操控力，仿如一部房跑車嘅個性演繹呢！

Wolfsburg易名Golfsburg有段古
眾所周知，德國福士車廠嘅大本營，係位處響Wolfsburg區內；然而，今年適逢Golf第5代嘅誕生，響當地政府嘅首肯下，Wolfsburg曾易名為Golfsburg一個月咁多啦！可見Golf深入民心嘅情況，又豈止係一款不起眼嘅大眾小車呀！

福士Golf2.0FSI規格
引擎：1984cc直4DOHC
馬力：150ps/6000rpm
扭力：20.4kgm/3500rpm
傳動：6前速手波，前輪驅動
懸掛：（前）麥花臣支柱（後）四連桿
制動：（前）透氣碟（後）碟式（ABS）
輪胎：195/65R15
尺碼：4204×1759×1485mm
軸距：2578mm；車重：1279kg
0-100公里：8.9秒；極速：206km/h
平均耗油：7.2L/100km
新車售價：約港幣20萬起
查詢：合泰汽車（28828938）

■一台全新2.0公升FSI偈，好力之餘又有慳油嘅特性。