上周港股大波動，上周五美股一度跌勢頗急，尾市轉穩，跌幅收窄，估計可令港股恢復穩定，反覆一番，再炒過。
恒指一周跌2.6%，中移動（941）一周跌5.9%，跌得過度，有技術反彈之機。上周四推介中移動Call輪9861，碰啱當日恒指大散501點，輪價由54仙瀉到38.5仙，唔見近3成，有機會反彈。近日跌得過度，隻輪數據比以前靚好多，12月中到期，溢價0.9%，槓桿率5.6倍。遠期中移動Call輪如9046、9902、9929等，都屬熱門貨，亦啱炒上炒落。
聯通（762）上周初最高7.70元，三下五落二跌到7元，再落，亦會有技術反彈，吼低買聯通Call輪，雖有4件，實際可揀對象得隻9884，年底到期，輪價80仙，溢價4.3%，槓桿率8.8倍；溢價其實唔算吸引，但同其他同類輪比較，已冇咁高。明年4-5月夠鐘嘅9172、9186，儘管槓桿率有10-12倍，但溢價去到22-23%，唔得實際，你買埋我份。
中電信（728）有向大股東買資產消息，或有作為，吼Call輪買，對象係9899，明年7月夠鐘，溢價6%，槓桿率3.9倍。
章盛