小學時代的甚麼秋季大旅行，想總到過城門水塘吧。
Wing與Ann年少裝老成：「十年人事幾番新，唔知重見唔見到馬騮仔呢？」馬騮，尚在，而且佔據了水塘各山頭，當土霸主，依舊向途人攔途截劫；菠蘿壩自然教育徑，尚在，但翻新了，路更易走；日落映照下的主壩，依舊雄偉……注定城門水塘，永遠是旅遊熱點。
記者：陳漢榮 攝影：梁細權 模特兒：Wing、Ann（RichStrategy）
日前百隻馬騮肆虐沙田，強搶途人食物，又提醒大家，馬騮的地盤，又再大大擴張！城門水塘亦早就被馬騮攻占，到此郊遊，也難免要與這群令人又愛又恨的小傢伙「交手」。馬騮其實叫彌猴，牠們雖然可愛，動作滑稽，但亦有兇惡一面，時常搶略遊人食物，要減低被「偷襲」搶食的機會，就切勿拿背心膠袋，因為牠們會以為裏面有食物，必搶。究竟這群勢力日盛的彌猴傱何而來？有說是上世紀，香港初成英殖民地，有英水兵帶彌猴隨船來港，一次遊山玩水，彌猴走脫，逃入深山，之後開枝散葉，但是否屬實，無從稽考。
未行水塘先醫肚，二人寧棄水塘內各燒烤區，在最接近小巴總站的1號燒烤區起爐，原因有二，Wing說：「入水塘BBQ好險，至怕啲馬騮仔嚟搶嘢食。」此其一；其二，論風景，1號燒烤區所在雖乏善足陳，但勝在有樹好遮蔭，Ann怕熱：「至怕頭頂個太陽，暴曬BBQ即係攞苦嚟辛，你燒埋我嗰份咯。」2件紅腸加3隻雞翼，二人消了腹空感，清理好火種，上山，走石級，向菠蘿壩自然教育徑進發。
Wing小二時曾到此一遊，依稀記得路如何走，「以前間遊客中心無咁新淨㗎。」經裝修後的遊客中心，今年國慶日重新開放，內裏有城門水塘及針山礦場的歷史資料：「以前問Miss，點解呢度無城門，佢都唔識答。」查資料，恍然大悟，原來滿清入主中原，明朝遺臣李萬榮誓死不降，率傷兵殘卒，由東莞逃至九龍，淪為海盜，在水塘附近的針山山腳建堡壘，築城門，以種植稻米與菠蘿為生，後清軍殺至，攻城掠地，拆毀城門，自此水塘一帶地區泛稱「城門」。英政府起水塘，其中一壩亦命名「菠蘿壩」。
教育徑全長0.9公里，45分鐘可行畢全程，優點是濃蔭夾道，輕鬆易走，途中，Ann問：「叫教育徑，咁教育乜先？」Wing答：「樹木囉。」「棵棵樹都差唔多Look，有分別咩？」「想知有乜分別咪睇傳意牌囉。」每隔一段有傳意牌，加上樹身的標籤，解釋此處的生態環境，甚麼鐵東青、羅浮柿、台灣相思、鵝掌柴、降青香、水翁、銀柴……管你平時見慣見熟，亦道不出各樹名堂。
「嚟嚟去去都係樹，重有乜好嘢睇？」Ann一心到主壩，想走回頭路。Wing說：「都係樹。」「咁不如走咯。」「咪心急！一陣睇到嘅千層樹林，保證你不枉一行。」教育徑最末段，近水塘山㘭處，兩旁千層樹一列排開，參天巨樹有氣勢，側有小路靠近水塘，此處的千層樹更多，生長姿態更美，樹蔭底，二人脫口一句：「原來香港都有咁靚嘅樹林！」
遊城門水塘，必行主壩，右邊觀測站是水塘測量員觀察水位之用，站側有類似牌坊的石屏，屏上刻有水位指標，Wing解釋：「睇唔睇到呀，水位過咗中間個『0』字，就代表水塘就快滿瀉，我小學嗰次嚟玩，撞正排洪，啲水衝落山，幾有氣勢呀。」Ann沒搭嘴，只顧望着眼前的鹹蛋黃發呆：「日落呀，個太陽靚到真係唔識點形容。」波平如鏡的水面、氣勢磅礡的主壩、將沉未沉的夕陽，確實動人，可惜身邊的幾隻馬騮只顧吃花生，不懂欣賞如斯美景……
