王見秋（圖）法官一上場平機會即時就清除異己，本來阿董上台，都想鏟除陳方安生，一朝天子一朝臣，喺私人公司司空見慣，但係平機會始終係半官方機構，用嘅係納稅人嘅錢，就變咗一場政治風暴。
呢位秋官今次當然有難，因為班民主派及非政府組織都唔係人咁品，唔容易纏，佢哋一聲發起一組織一票倒王，都咪話唔得人驚。
八方聽聞秋官以不變應萬變，一味話按規定辦事，受無理解僱嘅余仲賢話要告佢，秋官就更有藉口唔講嘢，但係究竟呢招得唔得，就要睇佢個後台老闆董建華重挺唔挺佢。
不過，從老董特別批准佢攞兩份糧，一份係退休法官嘅長俸，一份係相等於D8常秘嘅高薪厚職，喺現今猛話開源節流滅財赤嘅時代，就知王見秋甚得董先生寵愛。好多人為胡紅玉不值，當年紅姐全情投入，或者係能人特別易招人妒，又或者男權社會，始終唔畀婦女出頭，老董同煲呔不但不領情，重目露兇光威脅唔同佢續約，降級減人工，但係一換咗秋官上場，就乜都得，三年合約，保證D8人工，生來係女人，好似陳太同紅姑，始終命苦啲，機會平等？講下啫。
傳真︰2623-9278
電郵︰