朱孝天同佢個緋聞女友徐若瑄，大前日嚟香港幫有線宣傳佢哋合演嘅劇集《狂愛龍捲風》，但朱孝天落機嗰時，只得小貓三、兩隻嘅fans嚟接機。相反同為F4成員嘅言承旭，前日傍晚靜雞雞喺台灣飛嚟香港拍《魔幻廚房》，過百fans就一早走去機場接佢機，搞到機場亂到七彩，雖然大家都係F4，不過朱孝天同言承旭就真係同人唔同命喇！
前晚六點幾，言承旭着住一身便裝，戴住一個可以遮住大半邊臉嘅巨型太陽帽，喺兩個助手陪同下出現赤鱲角機場，可能見早前朱孝天落機水盡鵝飛，所以電影公司今次就冇請到保安，只係派出幾名工作人員，扮晒保安咁手拖手圍圈為言承旭開路，唔准啲fans迫埋身，點知咁就出事喇！
啲fans為咗同偶像影相同送禮物，係咁迫埋啲工作人員度，但啲工作人員就鬼咁兇狠，即時媽聲四起，反而言承旭就好好心情，見到成班fans都唔知幾開心，而啲fans重call晒的士同貨van，繼續佢哋嘅追星行動，重一路追言承旭返到佢住嘅中環麗嘉酒店。其實言承旭對fans嘅熱情咁受落，啲工作人員又使乜講粗口鬧人呀？
廖碧兒同男友劉愷威噚日去咗中環出席美容院開幕，劉愷威早前幫美容院影咗輯露毛相，佢話：「我之前影呢輯相時，飲咗啲酒壯膽，如果感覺好，我唔介意影裸照。」劉愷威重話唔介意同同志做朋友，廖碧兒睇過劉愷威輯相重大讚有八十分，佢嫌男友嘅手臂唔夠弗。廖碧兒都話唔介意影裸照，同劉愷威都幾心有靈犀喎！
任賢齊日前喺北京出席一個汽車活動，佢一出場就畀咗個驚喜啲歌迷，因為佢電咗個頭髮，又着咗件鮮紅色嘅褸。問小齊做乜電髮？佢笑住話：「呢個係新戲《花好月圓》嘅造型嚟嘅。」佢重話件褸係契媽喺Prada度搶番嚟㖭，好貴，但唔可以講幾錢，乜搶嘅唔係唔使錢㗎咩？
2R噚日為咗佢哋第一本寫真集喺銅鑼灣一間卡拉OK開記者會，佢兩姊妹話媽咪最近嚟咗香港探佢哋，佢哋咪應該好開心，點知反而大吐苦水話：「我哋媽咪嗰日陪我哋做嘢，點知俾個記者發現咗，我哋去食嘢嘅時候都重猛咁影，搞到媽咪有啲唔開心。」咁都冇辦法啦，正所謂人怕出名豬怕肥嘛，2R應該教吓媽咪點去適應咪得囉！
梁思浩噚日喺元朗出席一個活動時，被記者問到佢私房菜單官非進展成點，佢就話：「已經交咗畀律師處理，但我堅決要拆伙，唔想對方攞我嘅名嚟做生意，喺調查期間竟然發生唔見數簿事件，我覺得好好笑囉，啲小偷唔會咁無聊偷數簿啩。」其實計我馮仁昭話，同人合作做生意，真係好麻煩，不如下次自己一個搞好過啦！
