數碼影音：CanonVSKyocera入門機<br>$2,980雙雙登場

數碼影音：CanonVSKyocera入門機
$2,980雙雙登場

數碼相機真係愈來愈唔「專業」！老竇要一部，阿媽阿妹又話要部又輕又細，遲啲話唔定會發展到好似手機咁人人都有一部，所以輕細數碼相機發展潛力好大，各廠商自然努力針對呢個入門級市場推出新產品，好似呢個星期CanonDigitalIXUSi同KyoceraFinecamSL300R就同時間推出，雖然規格有啲唔同，不過同樣開價$2,980，好似擺明食住對方，充滿競爭意味。

記者：許福合
攝影：伍慶泉
ImageGirl：小惠

要成為隨身相機，機身一定夠細，試問誰會帶部重量級相機周圍走？Canon呢部IXUSi外型輕巧，重量只有100g，適合隨身攜帶，見到靚人靚景即刻拎出嚟影低。除咗細之外，機身設計亦花咗唔少心思，夠晒流線型，更用上金屬外殼，感覺非常硬淨耐用，最正係有4種顏色選擇，較常見白銀外，另外可以揀珍珠白、鋼琴黑同古典銅，各自有唔同特色，個人推介珍珠白同古典銅，尤以後者最搶鏡！

Profile
感光元件：400萬像素CCD
最大光圈：F2.8　ISO：自動50至400
變焦：5.7倍數碼　記憶：SD卡　電源：鋰離子充電池
體積：90.3×47×18.5mm　重量：100g

■$2,980

■金屬機身，有4種顏色可以揀。

至輕細400萬像素DC
科技一日千里，IXUSi咁細嘅機身，原來已經係一部400萬像素級嘅數碼相機，用嚟拍攝生活照或旅行相片都足夠應付。而同其他迷你相機一樣，未有內置光學變焦，於是就加強番數碼變焦補數，用盡可以達到5.7倍。雖然遠景拍攝IXUSi較為輸蝕，但微距拍攝就相當唔錯，近到得3cm都可以照影，加埋具有5點自動對焦系統，對焦準確快速，減少咗失手嘅機會。



易用兼敏捷
IXUSi唔少設計同功能都以快捷方便為主，新增一個快速拍攝功能（QuickShot），每當完全按下快門就會立即拍攝，可減少時間延遲，有啲玩LOMO相機嘅風味。
另外還值得一試內置鮮豔、自然、銳化、懷舊及黑白5種拍攝效果，同一個場景，都可以拍出唔同味道嘅照片。想即時印出睇吓效果，只要將IXUSi接駁好PictBridge打印機，唔使駁電腦都即刻有相睇，電腦盲都曉用，夠晒易用方便。

■機背按鈕都喺一隻手指嘅活動範圍內，方便操作。

■使用相當於39mm嘅定焦鏡頭，光圈為F2.8。

■雖然係入門級相機，Menu設定亦相當齊全。



CanonHK
查詢電話：21702888

■使用專用鋰電池，跟機會附送32MBSD卡。

■配合PictBridge打印機，即刻有相睇。

幻彩SL300R薄身照扭擰
雖然扭鏡功能喺相機界再唔新鮮，不過見到Kyocera呢部SL300R咁單薄，一樣可以扭扭擰擰，又非其他相機可以相比。合上鏡頭時，SL300R同卡片盒差唔多，厚度只有15mm，鏡頭可前後扭擰，可以高影低拍，玩埋自拍都得。機身嘅幻彩機面有銀、紅及藍三種，不過暫時只係返咗藍色，極具科幻Feel。
與IXUSi相比，SL300R都係打同一班用家嘅主意。SL300R解像度較低，只有317萬像，但扭鏡己內置咗3倍光學變焦，質素自然比數碼變焦好，加上用咗新開發嘅影像處理系統RTUNE，起動時間唔使1秒，連拍速度亦可達每秒3.5張，操作反應都值得一讚。另外有齊人像、風景及夜景等7種拍攝模式，具備易用及輕細嘅優點，整體上係一部唔錯嘅Snapshot相機。



Profile
感光元件：317萬像素CCD
最大光圈：F2.8至4.7
ISO：自動100至800
變焦：3倍光學+2倍數碼
記憶：SD/MMC卡
電源：鋰離子充電池
體積：100×62.5×15mm
重量：125g

■$2,980

■一扭埋，成個卡片盒一樣。



ULTRAPROCOMPUTERLTD.
查詢電話：23803082

■機背嘅LCD為1.5吋，同IXUSi一樣大小。

■按鈕主要係快速鍵，操作直接方便。

■機身只有15mm薄，要配番舊薄身充電池。