《維港巨星匯》搞到一鑊粥，好事變壞事，要怪嘅就係主辦者辦事唔得仔細，其次係包底人（政府）太過信任主辦者，可唔可以怪責某一個人呢？當然可以嘅，如果係相信大公司、大機構之內，一個中級職位嘅推廣經理可以手握大權，唔使問過CFO、COO就能夠亂咁使錢、亂咁行事嘅話。
美國商會主席詹康信雖亦是眾矢之的，但因為佢自己係大老闆，唔會俾人炒魷魚，所以企得好硬；盧維思可以俾上頭拍枱鬧，發放邊疆，但冇人郁得詹康信。美國商會主席通常係美國大公司駐港總經理，屬於高級打工仔一類，佢哋唔會膽敢孭嘢上身嘅，假如詹康信係××銀行嘅香港行長，成日俾報紙彈，實會激嬲紐約總部，認為佢敗壞銀行名譽，將佢炒魷都似。
據美國商會會員對左丁山講：「如果唔係詹康信做主席，商會邊度有咁勇，竟然夠膽主辦一件咁艱巨嘅大騷。詹康信最初信心爆棚，認為巨星到港，必受歡迎，因此除咗政府包底之外，佢自己亦拍咗心口。」究竟拍心口係乜嘢意思呢？會員唔肯講，於是左丁山周圍打探，卒之聽到一個路邊社消息，就係政府包底上限一億元，假如一億元都唔夠冚數嘅話，詹康信會私人掏腰包，如此勇猛為香港（佢早知道《維港巨星匯》有蝕冇賺），傳媒問佢道唔道歉喎，佢點會呀！