蘋果日報慈善基金援助社群，除咗用撥款形式，重都會透過轉贈物資，去幫助社會上有需要人士，呢個亦係我哋嘅重點服務。蘋果基金嘅物資來源，部份嚟自電器行、家具店等贊助商，其餘大部份就係嚟自熱心讀者嘅捐獻。
大使每日都會收到好多善長仁翁打電話嚟，話想捐乜捐物，上至電器，下至奶粉、玩具都有，奈何因為我哋辦事處嘅地方實在好有限，所以根本冇辦法全部收晒，大使會先記低資料，等到有case需要呢啲物品嘅時候，再安排運送。
咁多年來，呢個運作大致順暢，但大使有時都會聽到唔少讀者嘅意見。譬如話，有啲善長會話我哋嘅運輸隊效率唔夠快，令佢哋做善事都要等。大使好想趁呢個機會同大家講吓，事實上，幫我哋運送物資嘅車隊係屬於義務性質，不收一分一毫，佢哋平日都有正常嘅工作要做，實在好難一call即到，只可以盡量抽出空檔嚟幫我哋處理呢啲order，所以，既然大家都係做善事，大使希望各位捐贈者可以多多體諒同包涵。
亦有苦主同大使訴苦，話收到嘅電器、家具事前明明話好新淨，但實情係又殘又舊，甚至失靈，根本用唔到，令佢哋好失望。大使絕對相信，大部份善長仁翁都係出自真心嘅，但難免有少數人抱住「丟垃圾」嘅心態。老實講，因為資源有限，大使確實冇辦法逐家逐戶去check啲捐贈品，好多時大家都係講過信字，所以希望各位善長仁翁捐贈嘅二手電器、家具真係唔好太舊，唔超過三年，當然最好係完好無缺啦，受惠嘅家庭一定會對你感激萬分。
暖流熱線
電話：29908688
傳真：23702192
電郵：
網址：