日本中場稻本潤一響前日富咸爆大冷贏曼聯場波，幫富咸埋齋，威風八面。睇番呢個㗎仔開季以嚟表現都幾平穩，最重要原因係體能明顯好過上季。佢體質咁弗，原來要歸功於佢嗰位營養師。
記得舊年稻本投身英超後，基本上得三個月貨仔，過咗聖誕之後就「立」油，當時領隊泰簡拿就公開批評稻本嘅體能唔夠應付英超。
唔知係咪知恥近乎勇，稻本之後開始狂操體能，重棄用日本人，特登喺英國當地搵個營養師，幫助改善體格；結果證明有料到，佢體格今時唔同往日，大家應該要對佢另眼相看啦。
日本球員架勢，我哋位國足猛將李鐵亦唔失禮，前日對維拉踢正選，整體表現都唔錯。我求大俠對佢繼續踢正選充滿期望，大家都好期待十二月六日愛華頓對曼城場「中國人打吡」，希望佢同老孫可以同場較量。呢場波為遷就中國市場改咗時間，希望到時兩隊領隊都識做啦。
同樣係過氣球星，雖然波錫冇史杜捷哥夫咁好魄力，已經冇再喺綠茵場馳騁，但佢勝在夠食腦，唔使憂。日前佢被發現響曼徹斯特出現，即時引起佢可能重返球壇嘅傳聞。原來佢係同博彩公司接觸，打算響祖家克羅地亞搞賭波博彩生意，搞得成想話唔發達至奇。
前保加利亞國腳史杜捷哥夫不愧為一代球星，雖然佢已經三十七歲，但當年叱咤球壇嘅雄風猶在，噚日佢就以後備身份接應干維頂入個靚波，幫華盛頓聯隊迫和肯薩斯巫師。呢個入球令華盛頓取得美國大聯盟季後賽資格，係四年以來嘅第一次。果然係「家有一老，如有一寶！」
我求大俠上個禮拜提到柏林哈化教練史堤芬斯因為有球員擁戴，所以唔使炒魷。佢果然爭氣，前日即刻領軍作客砌低羅斯托克。同日比賽，啱啱由托比慕拿領軍嘅漢堡就無咁好際遇，明明領先兩球都被史浩克04迫和。一隊無換教練就贏波，另一隊易帥就贏唔到，妙！