下個月就夠四十二歲嘅美琪賴恩（MegRyan），自從兩年前嘅《隔世俏佳人》後一直冇戲拍，呢位人稱愛情片天后嘅女星，拍完九八年嘅《網上情緣》後更加係冇部戲收得，所以佢執妮歌潔曼（NicoleKidman）二攤都冇所謂，重毅然剝晒衫褲剝晒鞋，接拍情慾懸疑片《InTheCut》。
咁點解叫做情慾懸疑片？原因就係男主角MarkRuffalo扮演嘅紐約警探，查緊一單連環兇殺案，喺全紐約市發現好多殘肢，而呢位警探喺查案期間就邂逅咗美琪飾演嘅文學教授，兩個人開始發展一段建基於性愛嘅情慾關係，咁戲中當然唔少得佢兩個嘅激烈性愛場面，拍之前原本話好驚嘅美琪，喺片中亦露得幾徹底，不過我羅拉就嫌佢瘦咗少少，心口見晒骨。
原本《InTheCut》星期五至正式喺美國公映，不過部戲前幾日已經作有限度公映，好多對部戲有期望嘅觀眾睇完都唔多滿意，佢哋認為將情慾同懸疑擺埋一齊個方向係啱，但係導演就眼高手低，兩樣嘢都拿揑得唔好，搞到兩頭唔到岸。
而且重有人批評個結局無稽，搞到啲觀眾喺度猛咁笑，重話即使美琪剝晒都好難吸引人入場睇，年紀唔細嘅美琪咁露都救唔到部戲，我羅拉都戥佢可憐！