上星期五7.1遊行搞手梁家傑幫老友陳景生頒中大新聞獎，遲半日先出發去佛山，佢唔係去搵黃飛鴻嘅後人學功夫，而係去傾一份香港大律師喺大陸提供服務嘅標準合同，如果傾得成，就可以全國通行，唔止鋤低23條，佢重為祖國早日實現法治作出貢獻。
梁大狀噚日應該返咗香港，講開北上搵商機，梁大狀都好公正咁話，梁愛詩的確值得稱讚，因為大陸好講身份同對口，你係民間組織，佢就搵民間組織見你；你係官，就派官見你，所以詩姐姐一掛帥，大陸一定出最高級嘅人馬接待，傾乜都容易好多，而且唔使浪費時間。今次詩姐姐上京出席京港律師交流研討會，大陸咪出司法部嘅副司長同詩姐嘴對嘴，詩姐姐重話要搞隊國際法律服務大軍，發揮屍爬作用，完全無視佢即將落台嘅傳言，問你服未，劉炳章班人真係唔恨得咁多。
傳真︰2623-9278
電郵︰