呢排晶片股同埋印刷線路板股深受芬佬追捧，好似建滔化工（148）、依利安達（033）同埋街貨較乾的至卓國際（2323），股價升完再升，直至上周出現大跌市後，股價先至略為調整。
晶片股中炒味最濃厚的品質國際（243），股價亦在1個月內，由2.40元升至最高3.05元，上周五平收2.725元。經紀黃話，江湖傳聞品質或會趁股價高企，順便搞埋配股。
品質在8月底公布業績未如理想，股價一度急跌，但好快趣就反彈。9月份時，由於金手指趁高減持，亦令股價一直橫行，到近期終於出現突破。
品質在過去一年多，已經進行過3次批股，共抽水2.2億元，某程度上反映公司熱衷於集資活動，所以今次市場再有配股傳聞，實在不足為奇。
今日將有一隻奇股掛牌，就係只得50名股東，每手買賣計落要成10萬大元的北方企業投資基金（2324）掛牌。雖然話炒賣呢隻股嘅本錢相當大，但聽聞有關人等摩拳擦掌，諗住做場好戲。
慕容小初