蔣夫人宋美齡歸天，原來係國際新聞，連美國總統布殊都親自發表唁電哀悼，話佢係美國國民世世代代嘅朋友，生榮死哀，睇怕蔣夫人之後，冇一個炎黃子孫可以以平民身份，隱居咗二三十年，都重有咁嘅地位，呢啲，就叫做與國際接軌嘞。
美國政府面對歷史，中國政府就閃閃縮縮，蔣宋美齡明明係中華民國前總統夫人，中方政協主席賈慶林嘅悼詞，就話佢係「中國現代和當代知名人士」，簡直不知所謂。「知名人士」？香港嘅波場、高爾夫球場、紅酒雪茄界，都有大把。咁又係，正如民進黨所講中華民國已經不存在，所以蔣宋美齡亦變咗一個亡國知名人士嘞。
而中國外長李肇星重搞笑，佢話宋美齡反台獨，中國官方讚揚宋美齡「愛國」。宋美齡從來冇講過反台獨，佢係反共同埋反對一切反對蔣家嘅人。至於愛國，咁又兩睇，宋美齡只愛中華民國，完全唔愛中華人民共和國，重同蔣公合作，當年拉晒啲老共去槍斃，若果咁都叫愛國，咁顛覆中華民國嘅中共，咪變咗叛國囉？
再論證落去，又棧會令到啲親中人士青筋暴現，以和為貴，都係講番阿董。蔣夫人逝世，阿董連悼念都冇一句，當年阿董佢令尊翁董浩雲老先生，同蔣公有私交，老人家當年十分愛國，啲船掛正青天白日旗。蔣夫人假假哋都係董家嘅Auntie，阿董咁樣對待長輩，不忠、不孝、不義，唔通呢啲就係佢所講嘅「儒家治港」？
阿董扮啞，特區政府就梗係再做縮頭龜，連中國官方水水哋都表咗態，特區政府隻字不提，怕一開口，就得罪主人，真係失晒禮。
不過，有口痕友亦讚番特區政府同阿董一句，今次總算冇俾啲思想重停留喺六十年代嘅土共點，冇發表聲明，話「宋美齡是蔣匪幫的女幫主，勾結美帝，係人民公敵，死有餘辜」，唔出聲，已經好叻好叻。
至於董A1，平時對住啲下屬高官亦惡慣，寄望佢學到蔣夫人風采嘅千分之一，睇怕呢世人都唔使旨意。阿董就快去海南島博鰲參加口水大會，董婆如果跟埋去威威，嗰邊有咩野味好食，有咩平貨可以狂掃，返嚟記住通知吓傳媒呀。
傳真︰2623-9278
電郵︰