上個禮拜個市真係曳到痹，但係做拋光器材嘅必美宜集團（379），上個禮拜喺大跌市嗰日，股價無跌之餘，成交額仍然上升，個勢似乎幾掂。
聽朋友講，隻股喺之前已經喺有心人穿針引線下，介紹咗個外資芬佬畀管理層，希望個芬佬了解咗間公司業務後，會對隻股另眼相看。由於做拋光器材算係一門幾冷門嘅生意，市場上嘅競爭對手唔係好多，佢哋每年嘅邊際利潤都企得好穩，加埋息率算幾高，聽講話芬佬嗰邊初步已答應咗入股，估計喺年底前搞掂所有文件後，就可以公布。聽講個芬佬係歐洲名牌，應該幾有號召力，各位若果有閒錢嘅話，不妨買啲嚟坐坐。
另外，上星期有路邊社消息指中電信（728）將會向母公司買6省固網，實行做國內固網一哥。伏勝重聽聞班外資行一知道中電信有注資計劃，即刻對佢哋有番興趣，話下一輪投資報告中，會將中電信寫番上推介榜上。查實伏勝覺得隻股一向以來嘅質素唔係太曳，只不過係班芬佬要求太高，話佢哋增長唔高，寧願炒啲玩緊饑饉三十嘅「地主股」，都唔睇下將來會生金蛋嘅母鵝。有內地朋友話，國家現階段只係唔鼓勵中電信涉足移動電訊網絡，但無明示反對中電信發展其他同移動通訊服務有關嘅業務。中電信短期內涉足其他移動電訊業務唔係無可能，隻股上個禮拜跌到去2.2元就即刻反彈，好明顯係有班大好友睇到實，如果今次無乜閃失，個價應該可以再創新高。
伏勝