《維港巨星匯》將「盛事之都」變為「笑話之都」，一出咗事之後，好多人都走夾唔唞，與主辦機構美國商會及推動單位「投資推廣署」保持距離，尤其是詹康信與盧維思變成一對好合拍嘅搞笑明星羅路．哈地，政府官員避之唯恐不及。
據亞厘畢道觀察家講，《維港巨星匯》嘅意念產生於六月沙士末期，當時香港氣氛低迷，市道慘淡，大有為嘅特區政府急欲救市，財政司司長梁錦松主持振興經濟策略小組，周圍度計，美國商會提出《維港巨星匯》嘅妙計，小組成員一致贊成，決定由美商會統籌，政府包底，包底費係從十億元推廣香港基金中抽出嚟嘅。嗰陣時有人提出：「時間太急促噃，明年先至搞會準備好啲。」經討論後，大多數意見認為：○四年搞，畀個官你做吖，都過晒氣咯，大騷一定要從速上馬，刺激市面氣氛，十月尾十一月初面世。
唉，七月一日五十萬人上街後，氣氛唔同晒，香港急速反彈，氣氛完全唔同，加埋阿松哥辭職，人走了，茶就涼了，邊個官員重想理會松哥嘅手尾吖，於是得番一個盧維思頂硬上，冇一個部門幫佢手，人人睇住佢點樣去孭大鑊。
呢，𠵱家米奇老鼠真正孭到正，財政司司長唐英年老早放風話唔關佢老哥事，旅遊局話冇參與，民政事務局?康文署話冇角色扮演，新聞處不發一言，人人做咗快閃黨，成個政府咁大，好似淨係得盧維思一個人話事咁，唐英年重話要將佢發放邊疆㖭。咪話啲官員僵硬，要閃起嚟，佢哋非常靈活㗎。