以往由BANDAI製作嘅《Macross》水準認真麻麻，今次改由SEGAAM2操刀，好玩程度，差唔多係咁多代之冠！可惜歌曲版權問題，所以又係冇行貨番，不過水貨批發嗰邊，當然做到嘢啦！星期二晚已閃電抵港！
由於呢幾個禮拜日圓狂升，Game價亦變得水漲船高，批發價都要$400幾；鐵人睇見好多人喺Game場問價，都係抱住觀望態度，需知𠵱家新Game價錢有跌冇升，再加SEGA遊戲嘅慣例，出一排就跌價跌到儍，所以賣街價$420至$440，銷情都只屬一般。
講開銷情一般，《拳皇2001》PS2版都係去貨呆劑，大佬！街機嗰邊03都就出啦！𠵱家先至出01？啲Game唔好賣，好多時都係因為策略上做得唔好，真係有啲懷疑佢出Game嘅誠意！反而好似《TombRaider》等，賣$320至$330嘅行貨Game，就去得唔錯，另外隻《狐忍》重出現缺貨情況。
GC專享遊戲《BioHazard4》，雖然未有咁快推出，Fans如果等得心急！嚟緊12月PS2上有隻《BIOHAZARDOUTBREAK》，以外傳故事形式推出；今次故事與別不同處，係主線唔再落喺CHRIS同Rebeca身上，反而換上平民百姓、醫生、侍應等新人物擔大旗，而且重可以對應上網MUTI-play功能，唔上網？當然亦一樣玩得啦！
