響今屆車展會場內，除展出咗多款仍屬概念型號，又或者係快將推出嘅環保車款，無不令在場車迷大叫歎為觀止；原來響會場嘅另一端，大會更安排有一個最新環保車款試車場（EnvironmentalVehiclesTestRides），而且重提供有多款最新型號，並採用上不同環保技術嘅新車款（如豐田Prius、本田CivicHybrid及大發MoveFCV-K-2等等），供參觀者試坐一番，從中體會到環保車款好力、慳油及寧靜嘅特點之餘，兼且重能夠感受到未來汽車設計嘅新路向㖭！
近期響Game壇鬧得熱哄哄嘅電視賽車遊戲─GT4（GranTurismo4），雖然到推出日期仍有一段時間，但SONY已於場內安排有多部遊戲機，供車迷及機迷一顯身手，試試玩吓呢隻向來備受追捧嘅GT系列電視賽車遊戲；可惜筆者忙於採訪工作，否則定必停下來試玩一番呢！
如果你係玩具車迷的話，相信對Tomica呢個名字一定唔會感到陌生，皆因大家兒時理應擁有不少該廠出品嘅玩具車，當然筆者亦唔例外；而響今屆車展會場內，有關方面更設有一個Tomica玩具車嘅博物館，內裏展出咗多款歷年來由Tomica推出嘅經典玩具車，勢必令在場車迷感到目不暇給。而且你重可以選購，一套特別為第37屆東京車展而設嘅玩具車套裝，車款包括有大發Copen、萬事得RX-8、日產FairladyZ、三菱LancerEvolution及豐田WiLLCypha等熱門型號㖭！
大家響睇車展之餘，又想買番啲手信畀朋友的話，得！無問題！因為大會安排有多個售賣紀念品嘅攤位，由玩具熊、環保購物袋，以至係大會場刊及有關書籍等等全部都有齊，梗有一款啱你㗎！
