萬聖節已進入倒數階段，一班小嘩鬼早就急不及待，話要化番個鬼火咁靚嘅妝，然後倒轉去嚇鬼！革命是否成功，還看十月三十一日，但本來天真無邪的小臉蛋，經過刻意營造後，未能嚇鬼，卻先是人嚇人！不過，各位小讀者請放心，扮鬼效果只是趣怪沒有鬼怪！不如你都參考一下，學定點樣化個應節妝！
記者：月桂樹 攝影：萬利哥哥
蠢蠢欲動要化鬼妝的小朋友，先要注意一些化妝小技巧。那些平日靜雞雞偷用媽咪化妝品的細路女，今勻都可以繼續用媽咪的唇膏或粉底。不過，最方便的還是買盒畫面用油彩，顏色豐富之餘，又可畫晒成塊面（包括眼和嘴）。再不，平平哋買玩具用的萬聖節油彩一樣可以。小朋友的皮膚始終幼嫩，如果要化巫婆或殭屍的妝容，需要用粉底搽白成塊面才有效果，但就不是太適合細路仔。另要小心畫眼和嘴，對小孩來說這兩部位不宜上色太深。所以，簡單的畫花面，如紅鼻子、小丑妝或貓鬚等趣致造型，就最啱小朋友。
一眾小朋友留心聽完導師教化妝的技巧後，就躍躍欲試。知道自己可以將顏色塗往臉上，個個都開心到哈哈大笑！最初小朋友都跟導師的教導慢慢畫，但精靈的小朋友創意無限，小花面最終變成花面貓！
既然小朋友較適合化圖案簡單而可愛的小花面，咁我哋就畫隻小貓咪鬼啦！想學就昅實喇！
步驟
講到認真，全場一定係愷妮和Cherry呢兩位靚女，見佢哋一邊畫一邊交頭接耳，「喂！你話揀邊隻色好呀？」「試吓隻紫色啦！」見佢哋畫得有板有眼，連導師對佢哋都讚不絕口。「我哋平時偷慣媽咪嘅唇膏，所以畫嘴仔就最耍家。」
鬼馬的恒仔，是全場最活躍的小朋友，佢嘅創意認真犀利，第一步就跟足導師教路，起初依足嚟畫，但後來就發揮其無窮的創意。「紅色胭脂？女仔用嘅。我鍾意藍色面珠，我書包同筆袋都係藍色。」見恒仔愈畫愈開心，愈畫愈出位，佢一邊哈哈笑，一邊向我說：「我要畫到成塊面都係！因為媽咪平時實唔會畀我咁畫法。」
全場最細嘅希澍，年齡只有2歲半，雖然佢唔係好識畫，又唔夠膽將顏料往臉上塗，不過好彩有姐姐愷妮照顧，跟足老師步驟，幫細佬細心地畫貓鬚。細佬照鏡見到自己個貓樣，「家姐，化得好靚喎！」
睇得咁開心，係咪都好想化番個鬼妝呢？而且重係免費喎！現在只要於10月31日或以前到ESPRIT購物（任何消費金額），店員便會給你一張宣傳卡。於10月31日下午4時至晚上8時帶同此卡到指定的ESPRIT分店（註一），便可免費幫小朋友化個鬼妝。
另外，由即日起至11月2日期間，惠顧ESPRIT滿$500，可免費獲贈Halloween南瓜T恤一件。又凡於童裝部消費滿$300，可獲南瓜人糖果1個。查詢：27642000
