黃毓民前晚喺紅館搞棟篤笑，重搵埋林超榮（超人）做嘉賓，捧場嘅圈中人就有倪震、谷德昭（肥谷）、林建明、陳輝虹同鄭丹瑞等等。毓民一開場就寸《維港巨星匯》，佢話：「我哋有八成滿（現場睇似乎只有七成），不過入座率都輸俾孖女（Twins），因為佢哋係派飛，所以佢哋係贏波輸盤，我哋就輸波贏錢。」
毓民又話要競選特首，完成佢未完嘅使命，超人上台時就話：「咁毓民個內閣就要重組三司十一局啦，律政司司長就梗係由逢年尾就大叫真理必勝、正義長存嘅俞琤做啦！政務司司長就搵番董建華，因為呢個位都係俾人架空。財經事務及庫務局局長畀Twins做最好，因為佢兩個咁忙，都冇時間睇文件。」
對於馬逢國話7.1遊行之後，冇演藝界黑名單，但毓民就話：「點解訪京團冇陳可辛、陳嘉上、徐克等大導演呢？不過戲子肯寫自白書就得啦！好似杜琪峯都話嗰日係落街買嘢啦！」
毓民講講吓棟篤笑，竟然歌興大發，揸住個咪係咁唱歌，又同啲觀眾握手，馮仁昭重以為睇緊天王嘅個唱㖭？唔怪得之有觀眾笑住叫回水啦！
周麗淇（Niki）同鄧肇欣噚日去咗美麗華商場，為一個萬聖節活動擔任評判，原來佢哋兩個都曾經試過喺萬聖節時扮鬼扮馬，但係Niki舊年萬聖節時就戴咗一個猩猩面具出去，差啲嚇到個的士司機撞車，所以Niki以後都唔敢再戴面具出街。而鄧肇欣就話以前喺荷蘭都會扮鬼扮馬去問人攞糖，不過今年要做嘢就未必可以出去應吓節，咁萬聖節咪少咗靚女助興？
李若彤噚日去咗北京清華大學參加座談會，除清華學生外，重同北京大學同人民大學嘅師生見面，啲學生問咗好多有關學術同政治嘅問題，佢話：「好彩冇俾佢哋考起，佢哋對我嘅答案都肯收貨。」有記者問李若彤點睇楊利偉嚟香港，佢就話：「冇乜特別，因為單新聞都發生咗咁多日。」希望楊利偉到香港時，市民唔會好似佢咁冷淡。
關心妍（Jade）噚日喺旺角嘅泰林出現，佢除咗以七位數字做泰林嘅代言人之外，重可以喺泰林度隨便揀電器，有錢袋落袋之餘重可以慳唔少，阿Jade都話呢個job係佢入行以來賺到最多嘅工作，所以佢好識做：「我會請啲同事食番餐，鮑魚同魚翅都走唔甩㗎啦。」咁不如送電器重實際啦！
傅珮嘉前晚上咗麗星遊輪獅子星號演出「東華愛心滿載獅子星」，見佢手戴一條粉紅色水晶鏈，問佢有乜好處，佢好興奮咁話：「我悶悶哋想拍拖嘛。」講到擇偶條件，佢就話鍾意單眼皮，高大又叻又肥肥哋，但唔使好靚仔，最後補充一句：「我要求好低，陳奕迅已經幾靚仔。」咁樣藉陳奕迅過橋博見報，果然好嘢喎！
