楊森同李柱銘兩位新舊白鴿黨黨魁風格各異，呢樣嘢政壇中人個個心中有數，不過估唔到見一次阿董，兩個人南轅北轍嘅作風即刻公諸天下，八方聽聞馬丁對呢次會面頗不以為然。
兩位黨魁最明顯嘅分別，就係同特首嘅關係，馬丁已經俾阿董判咗「政治死刑」，認定佢唱衰香港同自己，所以「董李會」次次都不歡而散，呢次「董楊會」被形容為有史以來氣氛最好，楊森重話係己方嘅「誠意」感動咗阿董，又話雙方有好多地方傾得埋。
馬丁點諗？八方聽講佢都經歷過一番思潮起伏，起先有幾句牢騷，奇怪點解咁溫和，但諗諗吓，馬丁覺得唔應該對新主席嘅決定意見多多，要留多啲空間畀楊森，而且佢承認自己同阿董嘅化學作用一直好唔妥，𠵱家係時候放手畀新主席做。
但講到馬丁呢位舊主席最大感觸，就係同一日民主黨見完阿董就到自由黨，自由黨主席田北俊反而多多意見，又唔同意政府使錢態度、又批評政府聽民意唔夠廣泛，馬丁於是同人講笑，話點解民主黨好似同自由黨掉亂咗角色，自由黨比民主黨更加似反對黨？
傳真︰2623-9278
電郵︰