爆機狂迷：<br>兩大名廠炮製Macross明美靚歌重現

爆機狂迷：
兩大名廠炮製Macross明美靚歌重現

不經不覺，《超時空要塞》面世已22年，不過唔知點解，硬係冇一隻似樣啲嘅遊戲版本。今次PS2版《超時空要塞》，齋睇畫面已經冇得彈，更打正旗號玩齊電視、劇場兩大版本故事，經典場面大量出現；尤記得明美高歌一曲《可有記起愛》，成功令敵陣倒戈，全宇宙圍揪南瓜戰艦，鈴明美萬歲！

記者：徐影龍

售賣點：DreamStore
地址：灣仔東方188商場256號舖

三種形態各有優劣



今次BANDAI搵嚟世嘉AM2幫手做Game，確係明智做法，憑住作品名氣，再加王牌製作隊伍，效果出色，一啲都唔輸蝕比BANDAI×Capcom嘅《機動戰士DX》。

■GerWalk：可於地面高速飛行，同樣具有導彈及機槍。

■Fighter：飛得快射得遠，可惜轉身慢難追敵。

■Battroid：移動慢又冇導彈，勝在跳高轉身夠靈活。

靈活運用變身系統
相信遊戲系統乃眾多Fans關心一環，雖然遊戲開宗明義齋玩射擊，不過成功活用韋基利三段變身特色，喺唔同戰場發揮其獨特用法，如Fighter擅長遠程導彈、GerWalk則可於地面高速移動、而Battroid就玩埋身戰等，若可靈活運用三種形態，就可減低損傷。
戰鬥方式可算集各家之長於一身，一般飛行戰時，其複數導彈鎖定系統，頗有世嘉《PanzerDragoon》影子，而狹窄環境嘅困獸鬥，就充滿《機動戰士DX》味道，可幸整體尚算配合，令遊戲成功夾雜唔同嘅戰略同打法。

■刻劃韋基利Fighter形態相當之細緻。

■跟足原著劇情，避開巨形隕石營救偵察機Cat'sEye。

■裝甲版韋基利1J最強係連環導彈。

唔爆機即聽《可有記起愛》
遊戲內收錄了五首鈴明美經典金典，包括《小白龍》、《流露愛》、《天使之油彩》及《可有記起愛》。照正常要劇場版尾關先有得聽，筆者卻發現Option入面嘅BGM試聽室，已有齊上述歌曲，唔使打爆機都可任意收聽。

打餐懵為儲韋基利
遊戲開始時可選擇電視版（12關）或劇情版（8關），由背景、劇情到機體都各有不同，當中重會出現大量經典場面，如戴頓斯攻擊、逃離土星、麥斯大戰米娜等情節，令人相當懷念。當順利清除一關後，會啟動新嘅FreeBattle模式，畀玩家自由揀選Clear咗嘅版數。
遊戲設有CardCollection一項，不單可睇番過關獲得嘅新韋基利，如1J、1S等機體，重可透過Coloring（塗裝）噴上唔同顏色，最正係自製韋基利可用番係FreeBattle度，此舉令機迷有一玩再玩嘅興致，直接延長遊戲壽命。



遊戲類型：射擊
對應機種：PS2
遊玩人數：1人
開發商：BANDAI
售價：$420

■Macross右手戰艦戴頓斯，谷起護罩插入敵艦。

■CardCollecton內數儲起過關所獲得嘅新機。