財爺唐英年同佢老竇唐翔千都係資深馬主，噚日唐翔千名下隻「艷陽天」喺跑馬地出爭保良局百周年紀念盃，隻馬先奪最佳外觀獎，繼而捧盃，可謂雙喜臨門。不過財爺兩父子都冇到場，賽後只由唐媽媽做代表，喺保良局主席王賜豪手上接過獎盃。
唐英年做咗財爺唔得閒入馬場都預咗，但唐翔千一連兩次贏馬都冇出現，就比較奇怪。
唐夫人賽後解釋，話上次艷陽天贏馬時，丈夫身處北京面聖，至於噚日冇到場，係因為唐老剛從上海返港，覺得好攰，再加上佢對隻馬今場信心只係一般，所以索性留喺屋企唞唞。
唐夫人都撒嬌話冇得同老公一齊分享拉頭馬喜悅，有啲美中不足喎。不過贏兩場馬就執咗成七十九萬八千蚊獎金，冇拉頭馬都一樣咁開心啫！
（圖）唐媽媽揸實隻盃，與練馬師呂健威（右）同騎師韋紀力（左二）影番張靚相。
傳真︰2623-9278
電郵︰