九六年樓市炒得火熱時，瑞銀華寶董事總經理林奮強全面睇淡樓市，準確預測樓市轉角，結果成為最佳地產分析員，吸納唔少fans，噚日佢出席一個投資講座，就有癡情fans跟到貼。
話說林奮強講緊點解近年力排眾議睇好樓市，有位太太跑到台前影相，到佢回應提問時，呢位太太首先「彈起」攞支咪問：「我姓蘇，想問吓好唔好再買啲新地，我每次都聽你講，你叫買新地我就買，𠵱家好唔好再買啲呢。」
主持香樹輝即刻揶揄林奮強，問「係咪你帶嚟㗎？」林奮強就臉帶興奮加啲尷尬咁回應：「都可能有啲關係，因為我太太都係姓蘇。」呢位fans唔單止踴躍發問，重「像個小影迷要你的簽紙」，當林奮強落台，蘇女士嗱嗱聲撲過去，要求偶像簽名留念，林生嘅魅力認真唔講得笑。
（圖）「最佳地產分析員」林奮強魅力非凡，攞到佢簽名嘅蘇女士好開心。
傳真︰2623-9278
電郵︰