二人行，跟啞導遊「二儍」，觀長洲15顆奇石。
儍人做儍事，啞導遊不只儍，還癲，癲得不顧生命危險，攀山過嶺，只為芝麻坑一帶奇石命名；他身份神秘，行蹤飄忽，連島民也不知是何許人也；他寫得一手好字，滿腹墨水，每遇奇石，即作打油詩詠石。至於是點醒你還是破壞自然，由你評。
記者：陳漢榮
攝影：梁細權
模特兒：Polly、Iris(RichStrategy)
Polly熟門路，甫出碼頭，先到長洲書店買份詳細地圖：「行山，無幅地圖仔傍吓身，唔掂。」二人一心行芝麻坑，觀長洲勝景「三石朝陽」，地圖在手，路就易走。穿過了橫街窄巷，換上開闊山景。Polly面不紅，氣不喘：「好彩係石級路，重諗住好難行㖭。」數年前，政府為方便遊人，在芝麻坑斥資過百萬，興建了一條依山而建的「小長城」，沿途有路牌指示，兼置涼亭長椅，確實輕鬆易走。
Iris忽有發現：「喂！有人喺石頭留言，叫我哋落花瓶石兜個圈噃！」「唔知有無危險，信唔信得過？」「斷估無事啩！」「……」
花瓶石，老實說不太似花瓶，似海狗多點，勉強也似半身禿鷹，底部中空，繞個圈，有趣而不吃力，石側有留言曰：「半鷹金花瓶，一石有二形，山盟海誓約，幽洞可談情」言簡意該，字字清晰，Polly一笑：「談情就無謂嘞，我反而想知，邊個咁好雅興玩留言啫。」
Iris問：「點解叫三石朝陽，又講緊邊三粒石呢？」Polly一副專家口吻：「三石朝陽者，花瓶、叮噹、人頭是也，因為三嚿石向東，所以咪有呢個朵囉。」
叮噹石，呈三角形，向海一邊像蜂巢，給浪花打得滿目瘡痍，向山一邊較平滑，每有東北強風出過，氣流穿過中間石隙，會發出呼呼聲響，故名之。自問身手好，可嘗試抄小路走近，再過是人頭石，可望不可即，Polly說：「你估男定女？」「男！」「錯，係女人，重係好鬼醜樣嗰隻。」所言甚是，髻散髮亂、眼欠眉毛、鼻子扁塌、歪嘴豆皮，活脫脫一張見不得人的醜臉，二人邊走邊笑：「好似佢咁樣，唔使旨意嫁人咯！」「咪係，個指示牌重寫HumanHeadRock，計我話應該叫UglyWomanRock啦。」
路至中段，「我知邊個玩留言嘞，佢自稱二儍喎。」Polly指着路牌小鐵牌，念念有詞，Iris湊熱鬧：「口噏噏數乜？」「咪嘈，重數緊……原來行勻成條小長城，可以睇到15粒奇石呀。」據小鐵牌顯示，連三石朝陽在內，再計花瓶一石二形，另有肥羊、毒蛇、大象、烏龜、鶴、卧貓、老鼠、骷髏、駱駝、殭屍、玉璽等奇石，總計15顆，成個動物園咁款。惜無指示如何前往，「無計喇，邊行邊睇，話唔定二儍哥重有留言呢。」名副其實走着瞧。
愈行，奇石愈多，先有山邊駱駝石，雙峯畢現，狀似趕路，一絕；再來是碩大無比的大象石，隱伏半山，亦維肖維妙；之後是老鼠與卧貓石，兩者所在極近，配搭諧趣，Polly大笑：「老鼠捉貓，有無搞錯？」山頂還有鶴石，Iris拍手叫好：「好啜核啫，驚唔似，自己畫隻眼落去都得呀，阿二儍哥，服咗你咯！」確實不得不服二儍這石癡的豐富想像力，Polly提議：「不如上去影張相咯。」「咪玩喇，佢儍啫，你唔係陪佢一齊儍嘛？咁高，跌死都有之。」Iris說得對，山，雖未至層巒叠嶂，但根本無路可行，無謂逞強。
多走半小時，已是「小長城」盡頭，盡頭處還有顆玉璽石，何以名之？又與南宋帝昺有關，Polly講古：「話說阿帝昺被元軍追到港境，戰至一兵一卒，一條友從海路逃亡，心慌意亂，黑到連玉璽都跌埋落海，玉璽飄到長洲，就變咗玉璽石嘞。」「真唔真呀？玉璽咁重，點飄呀？」「話明話說咯，聽完咪算囉，聽古咪駁古喇。」
折返碼頭，醫肚時間，往碼頭旁的茶餐廳，食番碗車仔麵，論味道，一般，但環境好：「望住海景歎車仔麵，重有太陽傘遮蔭，算係咁喇。」吃飽，Iris提議乘駁艇到西灣，Polly一句：「吓？過西灣睇張保仔洞？好悶啫？」「唔係，長洲咁有漁港Feel，趁日落影張靚相咁解啫，船程來回20分鐘，夠時間影有餘喇……」
除了石頭，還有甚麼看頭？向花屏路進發的途中，有這間關公忠義亭。Iris好奇：「關帝廟就聽過，關公忠義亭？乜料呀？」
「好怪頭怪相，亭唔似亭，廟又唔似廟，重着燈着到五顏六色，好DiscoFeel喎。」也難怪Polly如此說，忠義亭有爐有鼎有香火，但格局不似一般廟宇，既沒甚麼過百年銅鐘牌扁等古物，也沒有滿天神佛，只正中央置8呎關帝像，Iris嫌沒看頭，一時口快：「個神像啡啡黑黑，無嘢睇嘅！」廟祝睇唔過眼：「小妹妹，你唔識貨啫，咪褻瀆神靈。」細問，整尊神像由原棵樟木雕刻而成，中間無駁口，是難得一見的藝術品。
