祖國的太空人成功上太空，與火箭全沾不上關係的航天科技（031）同埋航科通信（1185），借機炒作過後亦歸於平淡，股價大幅回落。
不過經紀陳話，航天科技真係有動作跟尾，據講即將同新世界基建（301）合作在大陸搞數碼電視同埋衛星電視廣播。
在祖國火箭早排升空之時，航科股價由0.50元水平，炒到上去最高0.81元，當太空人落返地之後，航科股價亦大幅回落，噚日收0.57元，冇起跌，但成交金額仍有1087萬元，依然活躍。
經紀陳話，早排大陸講過，要在數年內將電視數碼化，所以同類概念股如天地數碼（500），早排亦借同一消息炒作，兼且成功集資。
今次航科同新基合作，究竟雙方有冇協同效應，暫時未有分曉，不過就可能對股價會有刺激。
至於航科通信，股價表現就比較肉酸，由高位0.55元跌落嚟，噚日收0.38元，再跌5%，市場傳聞上次批股要咗貨班炒家，已成功獲利離場。
慕容小初