經過咗近半年嘅評審，中大新聞與傳播學院校友會舉辦嘅第一屆中大新聞獎終於揭曉，八方好多老友冇得參加，皆因年齡不符合要求──過咗四十喇！
咁都啱嘅，呢個獎都係想勉勵吓後進同傑出行家。結果有線電視首席記者蘇啟智憑報道《沙士中港蔓延》、《大陸賣血鄉》同《天下第一難》攞獎。
今次真係恭喜副總裁趙應春。阿春梗係高興啦，佢另一個手下──靚女主播張寶華亦憑《追問江澤民中央欽定特首》取得傑出表現獎。呢個獎本來冇嘅，但係啲評判覺得寶華勇氣可嘉。激到江總嬲又認真唔容易。另外，《明報》主筆劉進圖亦攞到一個傑出表現獎，表揚佢就23條嘅報道同分析。
大律師公會主席陳景生要打官司嚟唔到，改由人氣急升嘅梁家傑代頒獎，梁大狀話所謂四權分立，但係特區嘅行政係廢嘅、立法又因制度所限，剩下只有司法同言論自由撐住，所以傳媒要緊守崗位啦。
傳真︰2623-9278
電郵︰