𠵱家差唔多任何節日都係發展商借機搞優惠嘅檔期，繼今個月初嘅國慶同重陽節之後，嚟緊又有西洋鬼節萬聖節，發展商當然把握呢個搞鬼良機，買樓送優惠同時，齊齊玩番吓。
九龍倉就非常應節，今明兩日喺尖沙嘴擎天半島售樓處，請塔羅牌占卜專家姚安娜，同睇樓人士免費占卜。
咪以為淨係照顧九龍區嘅樓盤，深井嘅碧堤半島售樓處，今明日下晝，搞萬聖節派對，有專人同睇樓人士畫大花面繪彩，扮鬼扮馬，總之務求將氣氛搞得熱熱鬧鬧，整旺個場。
九倉賣樓話事人黃光耀，同埋中原一姐（劉瑛琳）噚日率先搞咗個萬聖節記者會，會上當然唔少得最應節嘅南瓜裝飾，一姐同黃先生重童心未泯，齊齊玩頂南瓜㖭。
近一個多月樓市旺咗好多，樓價重有升，短炒投資者開始出動。蘭西聽業內人士講，一啲舊區平價伙，不時都有短炒個案，斬獲唔少，新樓都冇佢咁和味。
好似灣仔區有個舊樓單位，炒家用四十幾萬買入，一個月後完成交易，隨即放盤，一日就賣咗，帳面賺三十萬。舊區啲樓仔咁多炒賣，原因之一係炒家以極低價入貨，但又唔大貪，多以平過市價放售，所以咪轉手快囉。
已故名人寶詠琴生前買落嘅收租物業，大部份係山頂、半山或者跑馬地一帶嘅豪宅區，原來佢喺大埔新峰花園，揸住兩個單位收租。
美聯鍾紹基透露，寶詠琴喺98年以一千三百二十三萬一手買入嘅三十一座高層A同D兩個單位，雖有投資客以四百六十五萬承接，帳面勁蝕八百五十八萬，不過兩個單位𠵱家每月租金收入夾埋只有兩萬二蚊，回報率唔夠兩厘，近排價好賣咗去都係明智。
投資移民客成近期地產界賣樓對象，發展商都要齊齊度橋配合，長實賣樓一向花招百出，今日就安排持海外護照嘅買家，優先認購長沙灣宇晴軒相連單位。為求逼真，出動巨型護照做道具，重請埋執行董事趙國雄客串演出，擔任護照嘅主角。
繼之前做紙板人後，今次又輪到示範護照，真係夠晒百變。本護照整得好逼真，有證件相同個人資料，國籍係GlobalCitizen，喺香港出世，不過出生日期就只寫12月。雖然個國籍係假設，但趙國雄成日都話要去唔同嘅地方，又做路演又賣樓，世界各地四圍走，所以用Global嚟形容，都尚算貼切。
蘭西
電郵地址：
