電影《2046》之前停咗工咁耐，𠵱家喺上海開拍番就趕到嘔，有幾晚都要拍通宵，趕住喺農曆新年檔期上。日本萬人迷木村拓哉同王菲兩個𠵱家就喺上海趕戲，木村早前返過日本之後，前日晏晝又返上海同阿菲做對手戲。
木村同阿菲兩個平時都係好cool嘅人，但原來兩人對對方都幾有興趣，唔知係咪為咗培養默契，阿菲喺上海嘅保母車竟然播住木村嘅歌，本來都冇人發現，只係聽到阿菲架車播住啲輕快音樂，咁有人八卦去問個司機，司機好得戚咁用國語講：「你怎麼會不知道，這是木村的歌啊？」然後攞咗張唱片出嚟繼續講：「聽說木村很紅，我剛剛跟他的司機拿過來聽，他唱歌蠻好聽的，有男人的味道。」
阿菲拍過日劇，識得幾句日文，英文亦唔錯，所以同木村溝通完全唔使繙譯，兩個不知傾得幾開心㖭，唔知係咪傾湊女經呢？
霆鋒跟咗訪京團去北京，重要對住前女友張栢芝同陳小春，阿菲就喺上海同萬人迷木村言談甚歡，唔知霆鋒會唔會呷醋呢？
日本當紅女歌手元千歲日前去咗台灣宣傳，佢喺星期三晚獲安排同周杰倫一齊食晚飯，兩個重互送紀念品，周杰倫同元千歲都係二十四歲同山羊座，兩個人表現得互相欣賞。
元千歲話睇過周杰倫嘅《雙刀》MV，重話覺得周杰倫喺最後一幕同個黑人女星擁抱嘅畫面睇嚟好怕醜，搞到周杰倫重尷尬。不過睇周杰倫同元千歲咁好傾，睇嚟都唔係好怕面對女性啫！
譚詠麟、陳百祥同樓南光等明星足球隊成員，早前去咗瀋陽同中國明星足球隊成員作賽，結果打成平手，阿倫重好開心咁向隊友派發幾百元嘅獎金，志在大家開心一吓。但樓南光喺場邊打氣嗰陣，打前空翻時唔小心撞到黃日華隻腳，額頭受傷，都算樂極忘形喇！
陳寶珠噚日接受薛家燕訪問，重專誠搵咗寶珠姐多年前嘅緋聞男友呂奇接受長途電話訪問。唔講唔知，原來奇哥一直都好留意香港新聞，特別係有關寶珠姐兩母子嘅新聞，𠳔重叮囑寶珠要小心台上嘅陷阱，唔好似林子祥咁出意外。而寶珠聽到之後只係儍笑，家燕姐就踢爆話：「你（呂奇）以前都淨係識夾嘢畀寶珠食啦。」家燕姐你唔係呷醋呀？
今屆世界小姐十二月喺海南省三亞巿舉行，來自世界各地嘅一百一十位候選佳麗會展開一連串中國之旅，行程包括嚟香港。噚日上年嘅世姐冠軍AzraAkin率先到港。
今屆世姐選舉由鳳凰衛視取得播映權，問港姐保母Rosa，本屆港姐亞軍楊洛婷將代表香港參賽，會唔會感到尷尬？Rosa就話：「梗係唔會尷尬啦，楊洛婷會跟足大會嘅行程出發。」
