白花油王子顏福偉當年追求黎瑞恩失敗，他前晚與袁潔瑩結伴出現蘭桂坊時，狀甚親熱，在斜路上輕推女方纖腰而行，袁潔瑩更伸手拖着對方，事後袁潔瑩還大讚顏福偉人好又錫她。
袁潔瑩（Fennie）前晚與白花油王子顏福偉結伴前往蘭桂坊，出席蘭桂坊集團成立二十周年之派對，與顏福偉雙雙出現時，狀甚親暱，拖手而行，儼如情侶。
顏福偉當年曾追求黎瑞恩，但未被對方接受，如今黎瑞恩已成為人母，反觀顏福偉這位鑽石王老五，感情至今未有着落，而Fennie自前年與王傑傳緋聞後，真命天子一直未見現身。前晚Fennie及顏福偉到達蘭桂坊，當兩人行上斜路時，笑容滿臉的Fennie伸手拖着尾隨的顏福偉，而男方亦輕輕推着Fennie的纖腰而行。
昨日本報致電Fennie，但她卻否認跟顏福偉拍拖，她在電話中說：「大家係驚混亂失散，唔係佢拖我就我拖佢㗎啦，我哋識咗好多年，係好朋友嚟㗎，真係拍拖嘅話，我唔會否認，我好多年冇拍拖啦，我都好想拖住個男仔，光明正大去街。」
問Fennie與顏福偉有否拍拖機會？她即笑說：「佢係好人，大家嘅性格又似，我哋傾偈好開心，佢係幾錫我嘅，但同佢？我諗會好笑囉，我好想拍拖，但睇機緣啦，至於發展機會，你問佢啦。」本報曾聯絡顏福偉，惜至截稿前仍未獲回覆。
此外，前晚尚有不少圈中人出席蘭桂坊派對，佘詩曼獨自到場，李樂詩偕一名男伴出現，許晉亨則拖着一名廣告女郎，與好友吳婉芳夫婦一同到達。
採訪：朱倬誼 攝影：陳烱威
