世姪女在「四大」（即BigFour）打工，經常到惠州、東莞、廣州等地核數；現時做會計專業，冇法子唔入內地，未考到牌之前，更加要跟大隊返內地啦。四大會計師行每年請咁多會計系畢業生，你估要留佢哋喺中環查銀行啲帳目咩。
世姪女去得到，逐漸學識咗一啲內地詞語，但佢在澳洲讀書，有時見到啲中文，諗唔番英文噃。這其中有一個學習過程，急唔嚟，但如果有一啲工具書，經常拎嚟參考，學習過程就會容易好多。譬如世姪女呢日問左丁山：「究竟『落實』、『工農業總產值』、『一慢二看三通過』呢類術語應該如何繙譯成英文？我哋𠵱家往往要做中譯英，將中國企業啲中文文件譯做英文，太長就搵專人做啦，但短短地都搵專人繙譯，自己都唔好意思。驚老闆話我唔識中文！」
問得好，但有時身在內地，唔好意思下下問人嘅話，不如就買本字典。中文大學出版社出版咗一本簡體字版本嘅《中大漢英詞典》（ZhongdaChinese-EnglishDictionary）」，最啱世姪女用。呢本詞典收集漢語單字四千五百個，多字詞條七萬多，其中二萬個係九十年代以來嘅新詞，每個單字的漢語拼音，譬如查「落實」，先查到個落字（luo），之後查到「落實」（luoshi），英文繙譯為carryout,fulfill,putintoeffect；「落實政策」就係implementthepolicy。呢本書係北京外文出版社出嘅，經修訂重新編排之後，由中文大學出版社在海外發行，好值得參考。