太空人楊利偉同神舟五號返回艙啱啱上完太空，下個禮拜就會嚟香港，中央挺董挺到出晒面，特首董建華當然不能不領情，噚日上午急召全港傳媒，喺特首辦大堂宣布呢個大好消息。
但好明顯，今鋪連太空人訪港都無法為阿董增加些少自信心，佢噚日對住記者用廣東話致完辭，一聽有記者問維港巨星匯嘅問題，即刻變身「快閃黨」轉身就走。不過班英文傳媒未聽到英文版無法交差，立即用英文大嗌，要求行緊出特首辦門口嘅阿董用英文講幾句。
呢個時候奇迹忽然出現，絕少俾記者叫得返轉頭講嘢嘅阿董，反應雖然照例慢兩拍，已經行出門口準備上車，但忽然企定諗咗一陣，然後轉身笑住用英文問，係咪有人叫佢講多次，又再行返入大堂轉台講英文，講完即閃不敢久留。
不過阿董今次又再犯咗政治不正確嘅錯誤，因為祖國送咁大份禮挺佢，佢竟然冇講埋國語，搞到在場內地記者要問香港同行攞料。
到咗下午阿董見白鴿黨議員，可能因為司徒華同李柱銘冇到，啲氣氛史無前例咁融洽，張文光以足球打開話匣子，對身為利物浦擁躉嘅阿董講咗句：「利物浦近來表現麻麻」，阿董講笑回應：「你一見面就拮我？」講乜都好，唔係叫佢落台，當然可以輕鬆好多啦。
傳真︰2623-9278
電郵︰