爆機狂迷：<br>慢動作槍戰MaxPayne2發哥上身

爆機狂迷：
慢動作槍戰MaxPayne2發哥上身

計月費嘅網絡遊戲下下搵真銀！相形之下「單機遊戲」真係愈嚟愈買少見少，水準之作更是難求；今年PC遊戲界重頭之作《MaxPayne2:TheFallofMaxPayne》，就係「少見」水準以上之作，故事刻劃細膩，畫面細緻有電影Feel，加埋「發哥」上身式嘅SlowMotion槍戰場面，唔使上網一樣咁好玩！
記者：朱崇德

老機迷都知，《MaxPayne》係少見「單機遊戲」水準之作，首集在2001年推出，在一片上網連線遊戲熱潮之下，都創下了全球350萬隻銷數，需知好多一、二線「網上遊戲」都係做緊呢個數，其他「單機遊戲」更是難望其項背；在細心籌劃兩年，今次推出第二集，絕對是今年叫人最期待之作。

■每個版圖，都會有呢啲美式漫畫插圖做過場，電影感十足。

■今集好多場景，都參照了上集設定，呢個火場景，是否有似曾相識感覺？

愛上女殺手一邊被追殺
上集一開首就講Max全家被人尋仇殺害，今集都一樣會延續佢嘅悲劇命運；《MP2》一開首就講Max得番半條命攤咗喺醫院度，而且重捲入咗一大班殺手追殺之中；承接上集故事，Max老婆仔女被殺，呢集佢都係孤家寡人一個，不過開發組好似有心玩佢一樣，要佢身為一個NYPD，竟然愛上一個冷血嘅殺手MonaSax！
對《MP》系列有認識嘅人都知，開發第一集時是有參照發哥《英雄本色》而設計遊戲系統，不過唔知今次有心定無意，筆者發覺Max新女友—Mona，都有幾分似《血仍未冷》女主角蜜拉索維諾，發哥熱潮真係Game仍未冷！

■遊戲中段，Max同上集一樣會被捉，玩家就以使用Mona營救，兩人關係真係唔簡單。

場景物件有即時互動反應
開Game第一樣直覺改進了的地方，明顯是場景及人物設定細緻了，梗係啦！人物的多邊形構圖比上集多咗4倍，就連細緻如口部，都可以隨住說話有動作，極強！
場景更是一絕！基本貼圖素材，是以紐約真實環境拍下所製成，配合遊戲灰暗的效果，像真度十足！此外，《MP2》還用上新開發的Havok2.0引擎，最強之處係做到即時演算的光與影、下雨及爆炸等場面！此外，遊戲中每個紙箱、椅子、人物……等等，都可以有自己的重量及物理反應！所以遊戲內一枱、一櫈、一紙箱，都有如實物一樣，同玩家有互動反應，感覺遊戲實在感極強烈；據知嚟緊嘅大Game《HalfLife2》，都會用同樣的圖像引擎，由此可見遊戲界也極看好！

■最強烈嘅物理反應，莫如中槍效果，近距離中AK47，隨時將敵人轟上天花板。

■細緻如廁所內一塊鏡，都可以有Max的倒影。

■光同影，都是以即時演算出來，感覺真實感十足。

BT2.0慢動作槍戰
「慢動作槍戰」係此Game成名要素之一，今集《MP2》一樣予以保留，簡單講係槍戰途中按下滑鼠右Click，就會發動限時的BulletTime2.0，敵人動作會變得非常緩慢，但玩家就可以照常速瞄準及開槍；如果擊中敵方，「BT2.0」的時計會由白轉黃，扣時間速度會減慢，無形中可加強槍擊Combo。
槍械設定特別，都係此Game成名絕活之一，發哥最喜歡用嘅雙手Beretta，今集一樣予以保留，不過火力更強勁嘅雙手DesertEagle，相信只有遊戲角度先用到！其他新槍還包括有輕機槍MP5、AK47和狙擊槍等，長、中、短火力無所不包，唯一可惜是減省了非常好玩的榴彈炮，否則槍械設定會更豐富。






遊戲平台：PC、PS2、XBOX
遊戲類型：第三身射擊
研發公司：RemedyEnterainment
代理公司：RockstarGames
發售日期：PC版（已推出）PS2、XBOX版（約12月）

■以第三身視點玩槍戰，加埋慢動作效果，真係好有吳宇森拍電影槍戰Feel。

■Sniper槍係今集新追加槍械。