周四晚美股回穩，噚日亞洲股市亦止跌。港股經過前日大跌501點後，噚日早市反彈上11800水平，但美資又出手大力將港股踩低，恒指由高位11819大插至11558，大市波幅超過261點。
不過，散戶被嚇至亂沽貨的情況唔多，沽壓只係一般，e莉莎重話睇見低位有美資大買盤接貨，最後恒指收報11736，微跌１點唔夠，成交縮至不足160億元。斷估今次美資的震倉活動已經七七八八，港股有望喘定。
中信國際金融（183）前日話收購一間深圳財務公司，已經引起市場注目，但當時大市跌到七個一皮，相信冇乜人敢跟進，噚日大市回穩，此股亦開始獲得資金追捧，股價升3%，收報3.375元。
收市之後，公司重突然話要發行1.5億美元可換股債券，唔通仍有重大收購跟尾？黑客話收到消息，中央為咗挺港，在審批中信國金收購中信實業銀行一事上，可能會鬆手少少。
不過即使收購唔到中信實業銀行，公司在發展國內財務公司業務方面亦需要唔少資金。另外，里昂加入唱好中信國金，話目標價睇4.70元。
中國首位升空宇航員下周三來港，到時唔知會唔會令所謂嘅航天股起哄，至於下周二掛牌嘅中航科工（2357），據聞招股獲逾50倍超購，並會以上限1.21元定價，重傳出在上市後至少升至1.30元，真係信不信由你。
人保財險更索性將招股價範圍，由原來的上下漲1.30-1.70元調高至1.60－1.80元，反映股民對上市新股仍熱情如火。
阿虎