由美國樂壇大姐大麥當娜（Madonna）一手捧出嚟嘅年輕創作女歌手MichelleBranch，近年喺本地吸納咗唔少年輕fans，佢下個月六號會同地位拍得住滾石樂隊（TheRollingStones）嘅搖滾老薑NeilYoung一齊喺《維港巨星匯》表演。
咪睇Michelle人仔細細，佢玩起音樂上嚟同好多rock友一樣咁激，我羅拉最近就睇咗佢首新歌《Breathe》嘅MV，原本Michelle同班樂手喺小屋入面jam歌，jamjam吓出面嘅陽光竟然射穿間屋，跟住成間屋重俾海水沖爛晒！
之後Michelle同band友繼續喺海灘唱歌，唱到尾聲嗰陣，佢重興起將個木結他掟落鹹水海，比起好鍾意喺台上掟結他嘅霆鋒激好多！Michelle喺MV完結之前，連套鼓都丟埋落海，不過我羅拉奉勸霆鋒千祈咪學呀。
查實Michelle呢排忙於舉行世界巡迴演唱會，下月五號佢喺東京開完騷，第二日就會嚟香港演出，喺本地停留唔過十個鐘，半夜又要即刻飛去日本福岡繼續巡迴演唱。