一吋有多重要？視乎那一吋是甚麼。
好像，腳甲成吋長，對麻甩佬來說，毫不重要，所以他懶得去剪。
對不少人來說，腰圍小一吋，胸圍多一吋，身高多一吋，全部都非常、非常、非常重要，不惜一切，也要達到以上目的。要是可以達到兩吋，那更是妙上加妙；達到三吋，欲仙欲死！
怪不得有些女人，得吋進呎，走火入魔，把自己纖體纖到變成洗衫板，教人認不出她是誰。（我實在無法理解，好好的一個女人，為何會覺得做洗衫板比做女人靚。）
人生，真的是為了那一兩吋，那兩三吋嗎？我感到迷惘。每當迷惘，和肚子餓，我便找煮飯婆。
問煮飯婆：「我個肚細一吋好唔好？」她答：「你個肚幾細都係咁大。你食咁鬼多嘢。由鬼得佢啦！」答得好。
我又問：「咁，我個胸大一吋好唔好？」煮飯婆反問：「大嚟做乜？幫到我做家務咩？」一計見血。我縮頭縮髻，不敢在胸肌問題上糾纏下去，免得煮飯婆忽然又要派我做家務。
本想問，陽具使唔使長多一吋，但這類問題，不好問長問短。
問其他問題：「咁你話，我啲頭髮長多一吋，抑或短多一吋好？」煮飯婆再次一針見血（佢針針見血，好厲害）：「冇分別，你頭髮幾長幾短，你個腦都係咁戇居！」實在完全無法辯駁，因為是事實。
問多一條：「咁，我高多一吋好唔好？」煮飯婆望我一眼：「你的確好似越老越矮。羅家英高過你。」
羅家英？羅家英是甚麼傢伙！怎可拿他和我比較！
大怒的我，立刻把陳年夾band時代的高跟黑皮靴，找了出來，穿上，登時高了三吋！
衝上街，找羅家英比高。落樓梯時，拗柴，差點仆死。早已說過，有些人，為了那兩三吋，不惜一切。