周四大散一日之後，周五仍有驚魂，恒指高低波幅達260點，相當嚇人，埋單微跌1點。4個鐘頭交易，令好多人財富轉移，朝早摸頂買貨，跟住摸底沽貨，可以先輸15-20%，但若然低位撈貨，去到收市則又有10%利潤，能夠處變不驚者係撈嘢一派。
升輪變化，冇前日咁癲。輪王之王係中銀Call輪9886，前日啱啱話過隻輪唔係好嘢，昨日即急升33%，由4.5仙彈上6仙收市，不過成交唔似樣，金額皮半唔夠。隻輪明年3月到期，溢價39.5%，槓桿率213倍。睇數據，去到尾正股要跌40%（即係差唔多要跌1半），揸隻輪先至唔使輸錢；睇行使價，正股（現時12.80元）要散到7.80元以下，隻輪先至唔使變廢紙。若然正股真係散到呢個價，則港股非常悲情，贏咗隻淡友輪，會有好多廣大股民陪葬。
品質（243）企定喺2.725元，Q仔隻公司輪609則由7.8仙升上9.4仙，做咗輪王阿3，明年1月到期，數得出剩番幾多日子，但溢價去到128.7%，槓桿率29.5倍，行使價6.14元，真係望正股有機會升1.3倍以上？玩Q仔輪，非常唔實際，要搞應該直接搞隻正股。
死火輪第一位係中移動9351，冇成交，電腦判按盤價2.025元，散33%。呢隻係麥銀發行嘅X輪，槓桿率與溢價點計好難搞，咪淨係睇大利市機嘅數據。自己唔曉嘅嘢，最好咪搞。
章盛