人哋話「秋風起，三蛇肥。」我就覺得應該係「秋風起，腳仔疲」至啱。乜唔係呀，個個都話秋高氣爽要行山遠足，連口靚妹口靚仔都話要去。不過，大家知唔知道遠足可以好辛苦。所以，未正式行山之前，先嚟一個熱身課程，地點係屯門龍鼓灘，嗰度有近千級樓梯等住你，行完唔索氣，先至好應承朋友去行山呀。
記者︰鍾可強 攝影︰莫顏聰
Model︰Leo、Piko（RichStrategy）
自從沙士一役，香港人個個講健康，聽見人哋話行山，阿叔阿嬸𡃁仔𡃁妹都驚死蝕底，人去佢又去。即係咁講，行三分鐘唞五分鐘就唔出奇，但係，咁行法何苦？想知自己係咪行山材料，等我介紹一條行山熱身徑過大家，行過返嚟冇腰痠冇腳痛，咁你就可以大聲同朋友講，幾時行山呀，記得預埋我！
今次介紹嘅行山熱身徑就係龍鼓灘，位於新界屯門嘅市郊，距離市區大約二十分鐘巴士車程，絕對方便。
呢度有兩條山徑，可成為閣下行山能力測試指標。第一站係行上323級樓梯，到達龍鼓灘中華白海豚瞭望臺。要搵呢條山徑一啲唔難，就在巴士總站的左邊，全程都係人造石階，不太斜，唔會太難行，悠悠閒閒十分鐘就可到達山頂。上到瞭望臺，就可以俯覽龍鼓洲同埋沙洲等白海豚出沒嘅水域。遠就遠咗啲，一定要用望遠鏡先叫做睇到啲嘢。但係，講Feel嘅啫，喺咁秀麗景色之中，見唔見到海豚都咁開心啦！而且重有龍鼓灘全景及電力廠遠景，都幾壯觀㗎！
望完有白海豚出沒嘅大海，在山頂處吹吹風，係時候落山，覺得體力重好充沛？咁就要提升難度，跟住就要作登山測試第二擊！都係行樓梯，不過再長啲，457級。
第二個目標係龍門徑，起點喺巴士站旁北朗村後面，有清楚路牌指示，一口氣上山嘅話，25分鐘左右便可到達位主打景點「皇帝巖」，但係比先前中華白海豚瞭望臺難行啲，因為樓梯斜好多。行到一半都開始腳軟，忽然之間有人話到咗，成個人醒晒，咬實牙關衝埋上去。嘩，呢個「皇帝巖好宏偉呀！」路人甲話。喂，唔好亂講扮識嘢，好多人都會誤會咗，查實去皇帝巖一定會先經過呢嚿超級大石，但記住，冇洞就肯定搞錯。吓！咁咪重要行。
頂硬上啦，鬼叫你要行山咩，喺對腳接近甩咗出嚟嘅時候，終於望見一嚿大石，石身有「皇帝巖」三個大字，呢嚿至係堅嘢！咁就梗要入去睇睇咩料。
睇真呢嚿皇帝巖原來同其他巖石叠成洞穴，洞內可容納十多二十人，相傳當年宋帝昺逃避元兵追殺，匿藏至此。在此又可欣賞龍鼓灘風光，憑高遠眺，別有一番景致㗎。
能夠一口氣不作休息直上皇帝巖，你絕對有資格玩遠足，如果要喺中段休息，都可以柴娃娃跟啲朋友仔去行山嘅，但就千祈唔可以逞強。若然上到一半都要唞足半個鐘，咁唔該你以後淨係去燒吓嘢食、行吓沙灘好嘞，行山？NoWay！
以為玩龍鼓灘只係行石級？咁就錯晒啦！落番山，山腳下嘅沙灘都咁精采，呢度唔單止活動多多，而且夠多樣化，一家大細都咁啱。好似喺沙灘旁踩吓單車，又或者去釣魚場釣吓魚。
傍晚時分，就更加要留喺沙灘，因為唔可以錯過太陽落山嘅壯麗景色。龍鼓灘位於新界西邊，是看日落嘅絕好地點。在沙灘上睇住恍如大鹹蛋黃嘅太陽徐徐落下，彩霞散綻在天空，遇上天色頂好的日子，場面美得動人。所以龍鼓灘成為不少年輕男女必到嘅拍拖勝地。呢個時候，龍鼓灘嘅大小食店亦已將大嚿大嚿黑炭燒得通紅，正等待各位遊人進行燒烤大會，遠望紅霞，近望燒得金黃嘅雞翼，呢種郊遊樂趣，算係老幼咸宜，全天候啱玩啦！
