「早晨！查理～」，一貫天使式口脗，《神探俏嬌娃2》上畫時，的確帶畀筆者豐富嘅娛樂性，全片106分鐘就打足90分鐘，飛車爆炸場面不絕，筆者心滿意足地離場。DVD三區版剛剛推出，重溫一次亦覺精采，就算家中電視細得多，不過以WideScreen收錄仍充滿電影感，聲畫表現一貫出色，尤其係5.1聲音頻道認位頗準確，多人對打場面一啲都唔覺亂，各式飛車場面亦覺氣勢，唯一可惜係未有收錄dts格式。
DVD必備嘅Bonus亦唔馬虎，製作特輯包含四大類，由性感舞蹈到名貴跑車，都有詳盡介紹。另外戲內播出之多首名曲亦有收錄，不過並非完全版本，較特別係連串星都有專頁介紹，對於如筆者般老一代嘅戲迷，見番「元祖天使」積琪蓮史密夫確實驚喜，你會驚歎阿媽輩嘅靚女，二十年後居然一啲都唔覺老，明星風采比三位新天使，甚至迪美摩亞都高出不知幾多班。
記者：徐影龍
