萬眾期待的大幅調整，終於出現，恒指唔單止跌穿12000大關，重一口氣跌到11800至11600嘅重要支持區先守得住，收市11737，大跌501點，成交亦大增至201億元。標普期指跌勢未止，港股期指大低水72點。
噚日嘅大跌市，係好多原因促成，最主要係本身升幅太大，隨時都要調整，而美股走勢轉弱，則係觸發劑，至於噚日日股急挫，以及大摩將港股投資評級降低，則加速港股午後嘅跌勢。大摩今次將港股調低兩級，由「增持」變為「減持」都算重手，但只係大體而言，國企同工業股一樣係個別發展。大市借勢調整，大家又有機會買平貨。
大市急挫，係第一個警號，但係中期調整開始，抑或仍係小調整，暫仍未能確定。若係「中調」，則恒指可回落一千幾百點；如係「小調」，則守得住11600，又會再上過，話唔定會再創近期新高，升埋呢轉，「中調」先會來臨。家吓未見有熱錢流走嘅迹象，估計係借勢調整居多，暫不宜睇得太淡。
噚日下跌股（不計認股證）超過670隻，即使強勢如鋼鐵股，跌幅亦唔細。早幾日提過短期會有動作嘅金威集團（910），亦跟市調整，收0.395元，跌幅3.6%，都算溫和，成交1128萬股，沽壓唔大。金威同中科院合作科技項目，新發展的納米業務，市場拓展迅速，而一向看好金威前景的中資基金，亦收集咗成兩年時間，今次勢會借勢發圍，佢哋當金威係寶，心目中嘅目標價，起碼在1元過外。
金威下禮拜一宣布業績，03年度（6月年結）的下半年，由於受非典影響，盈利應該唔會好，但踏入04年度，納米業務開始產業化，無論在紡織、建材和生物技術各個範疇，都有長足進展，單係合作夥伴支付的專利技術使用權費用已有數千萬元。
金威最近取得定單，為正在北京興建中的國家大劇院外牆玻璃進行納米加工，此消息引發玻璃製造業的興趣，目前有多家廠商洽談中。至於納米建材亦已投產，產品供不應求，由於國家規定大部份學校的運動場都要進行改造工程，使用納米建材，市場的發展空間極大，涉及金額以億元計。
郭兆誠