退出演藝界嘅韓國女星沈銀河，原本去咗法國學畫畫，不過最近已經返咗祖家，有傳佢唔適應當地生活，但亦有報道指沈銀河阿媽身體唔好，所以身為乖乖女嘅佢要返去照顧老人家。
返回韓國嘅沈銀河，一舉一動依然受到當地傳媒注意，前日清晨有電視台就影到佢送阿媽入醫院嘅情況，不過此舉竟然引起觀眾投訴！
話說前日清晨時分，沈銀河阿媽腰痛惡化，要即刻叫救護車入院，而韓國MBC電視台，一早已經喺沈銀河屋企門口部署好晒，佢哋拍低咗沈銀河同佢老竇送阿媽上車嘅過程，重喺節目《SectionTV藝能通信》中播出，結果廣大觀眾都睇到沈銀河喊晒個樣，同佢阿爸當時好擔心嘅表情。
MBC電視台今次的確拍到單勁料，但好多韓國觀眾睇完個節目之後，即時向電視台投訴，認為佢哋咁做係侵犯咗沈銀河嘅私隱，有觀眾好嬲咁話：「人哋沈銀河話咗退出演藝界，已經係普通人，電視台咁樣公開人哋嘅私事，即係漠視佢嘅人權！」亦有觀眾好嬲咁話：「假如你親人要入醫院，你又想唔想一樣咁俾人影住晒？」唔少fans都要求電視台放過沈銀河，唔好再作出同類型嘅報道，真係充滿溫情。