恒指噚日勁跌501點，唔少投資者被嚇親，紛紛將股份沽出，但偏偏有幾隻股票頂得好行，重夠膽逆市上升。其中一隻就係日東科技（365），連經紀陳都話跌眼鏡，諗唔到隻股炒得咁勁。
日東升得咁勁，皆因江湖傳聞佢在一個月內梅開二度，將進行第二次配股集資。
在大跌市中，日東竟然最高見過1.41元，收報1.33元，升6.4%，創下一年新高，成交股數1449萬股，金額1928萬元。
小初記得，日東喺月頭已經有異動，跟住以每股0.61元，搞咗一次先舊後新配股，集資2250萬元。之後隻股完全唔使唞氣，繼續炒上。經紀陳話，如果日東真係再配股，作價肯定高過上次好多，集資額亦會多過上次，果然係逆市奇葩。
另外一隻夠膽逆市炒上的股票，就係科建集團（563），隻股先幾個月先至完成引入新大股東，之後就由唔夠0.10元炒上，而呢排升得特別厲害，噚日最高見過0.44元，收0.40元，再升9.59%。經紀陳話，隻股稍後可能有注資計劃。
慕容小初