美股唔掂，日股散晒，港股冇運行，只係估唔到恒指一瀉就係超過500點，冇幾多隻股票好睇。咁嘅環境，自然係Put輪天下。Put輪好耐都未試過咁意氣風發。
成交唔細而升幅勁嘅有恒指Put輪9896，收2.5仙，升1.1倍，有128球易手。炒呢件完全係賭，隻輪年底到期，行使價係恒指10400，到時恒指（現時11737）唔低過呢個位，隻輪就可以用嚟墊煲底，墊煲底嘅機會相當大。
如果睇淡嗰市想做嘢，買恒指Put輪，有3件比較實際，就係9133、9143、9145，全部都係價內與價外之間，而溢價又喺10%以下，壽命到明年3月至5月。不過，玩淡友輪要小心，因住美股彈番上去，帶動港股，到時，揸咗Put輪嘅又會頭破血流。
藍籌Put輪中，長實9866、滙豐9885、和黃9905，依次升208%、122%、88%。3隻輪年底至明年初夠鐘，溢價14%至21%。咪貪心玩呢類輪，望正股跌14%至21%，好唔實際。
中銀（2388）散1元，咪以為中銀Put輪會有着數。得隻9886，收4.5仙，只升5%，成交金額唔夠3皮。冇跟正股作相反方向大移動，係因為太過價外。明年3月到期，行使價7.8元，望正股（現價12.75元）跌到7.8元以下，你話機會有幾大。
章盛