散戶噚日一見勢色唔對，立即沽貨獲利鬆人，結果大戶未真正出手減持，散戶的沽盤已經在上午湧現，令大市勁跌逾300點，午後大摩呼籲投資者調低港股投資比重的消息一出，歐資基金才開始減持，結果恒指全日勁跌501點，收報11737點，成交201億元。
阿虎見到唔少大經紀牌，在大市跌至11700－11800水平時入市接貨。e莉莎亦話，今次只係港股長期升浪中的一次較具規模震倉，唔代表港股升浪完結。
據講唔少大戶平均持貨價在10500水平，如果現時就開始出貨，根本冇肉食，更何況全球資金現時缺乏出路，亞洲及香港經濟情況又正在改善，外資暫時都唔捨得離開香港。據聞噚日唔少散戶獲利套現後，換馬認購中航科工（2357）新股，令到認購反應更加理想。
萬勝（376）宣布與上海通用化工技術研究所組合營公司，拓展域名註冊業務，註冊資金只係2000元咁大把，總投資金額亦未定。不過，萬勝噚日開市就係威係勢，一度逆市勁升15.5%，高見0.41元。
原來佢嘅合營夥伴來頭唔簡單，係信息產業部「十進制網絡標準工作組」組長單位及「新一代安全可控信息網絡技術平台總體設計」專家組組長。萬勝泊上信產部呢個大碼頭後，將改名為亞洲電信媒體，為業務轉型進行部署。不過，萬勝始終不敵大市洪流，最終要跟隨大市下跌，倒跌8.45%，收報0.325元。
阿虎