維港巨星匯搞到一鑊粥，插手本港內政嘅美商會俾人鬧到飛起，政府想卸隻鑊都好難，前幾日財爺唐英年話美商會係外行，但係原來佢自己都唔好得幾多。
噚日財爺喺北京俾記者問到噚日維港匯派飛嘅大混亂，佢好想解釋得清清楚楚，結果由英國女子組合AtomicKitten其中一個成員病咗開始講起。佢一開口就話，有一隊叫「AtomicCats」嘅樂隊，點點點，在場記者當堂俾佢嚇親，Kitten係貓仔，Cats係大貓，正如李國寶明明係一個Man，點知就俾人叫做Baby，又會咁嘅？
佢都重未知自己講錯，後來記者提佢，佢先至尷尬儍笑，話自己唔係好識，總之唔理大貓定細貓，「嗰渣貓唔嚟得啦！」之後佢一路用「嗰渣貓」嚟形容AtomicKitten，真係唔知好嬲定好笑。
財爺唔係貓專家，佢噚日出席一個京港經濟合作研討洽談會發言，講普通話都嚇咗好多人一跳，雖然在座所有人都覺得佢講得已經好搏，但力水唔到，如果佢想同胡溫哋親切少少，睇怕真係要喺呢幾年惡補惡補先得。
傳真︰2623-9278
電郵︰