港股噚日一句話講晒，就係走得快好世界。周三晚睇見美股大插水，加埋之前倫敦港股走勢古古怪怪，滙豐（005）俾人舞上舞落，已叠埋心水噚日早沽貨。
恒指噚日大裂口低開211點，低見12027，相當嚇人，趙飛雲馬上沽清手上股票，11時後，恒指再度跌穿12000關，在0.152元買入1球恒指Put輪9133，之後睇住恒指跌落11900企一陣，跟住又滑落11800，最後勉強守在11737收市，大跌501點。尾市睇見淡友並無平倉意圖，恒指反彈無力，所以唔急於將9133食胡。
不過，今日港股如果低開，則伺機在11600附近食胡，因為預期恒指在11500水平有支持反彈，可候反彈跌幅1/3左右再買入Put輪；若今日先反彈，可候升近10日線不破加注。
恒指這個遲來的2浪調整，不跌則已，一跌驚人，可見大戶部署的狠辣。按調整1浪升幅0.4計，浪底約在10700水平。除非恒指短期內又再戲劇化升破12021頸線，否則反覆下試10700機會相當大。可候恒指跌近9月底部10762附近吸納優質股長線持有，迎接3浪來臨。
趙飛雲